Atyraýda zańsyz qoqys úıindileri úshin 7 ákim jaýapqa tartyldy
ATYRAÝ. KAZINFORM — Atyraý oblysynyń Jylyoı aýdanynda prokýratýranyń tekserýi barysynda eldi mekender aýmaǵynan 62 zańsyz qoqys úıindisi anyqtaldy.
Zańbuzýshylyqtardy joıý boıynsha qabyldanǵan sharalardyń nátıjesinde Qulsary qalasy men birneshe aýyldyq okrýgtiń ákimderi ákimshilik jaýapkershilikke tartyldy.
Jylyoı aýdanynyń prokýratýrasy qorshaǵan ortany qorǵaý salasyndaǵy zańnamanyń saqtalýyna júrgizilgen taldaý kezinde aýdan aýmaǵynda zańsyz qaldyqtar ornalastyrý faktilerin anyqtady. Kózben sholyp tekserý nátıjesinde Qulsary qalasy, Jańa Qaraton kenti, sondaı-aq Qosshaǵyl, Jem, Aqkıiztoǵaı, Qaraarna jáne Maıkómgen aýyldyq okrýgterinde ornalasqan 51 ýchaskeden 62 zańsyz qoqys jınalǵan oryn tabylǵan.
Prokýrorlyq qadaǵalaý aktisi negizinde anyqtalǵan zańbuzýshylyqtardy joıý sharalary qabyldandy.
— Nátıjesinde Qulsary qalasynyń ákimi, Jańa Qaraton kentiniń ákimi jáne 5 aýyldyq okrýgtiń ákimderi ákimshilik jaýaptylyqqa tartyldy. Óndirilip alynǵan aıyppuldardyń jalpy somasy 227 myń teńgeni qurady, — delingen prokýratýra habarlamasynda.
Budan bólek, jyl basynan beri eldi mekenderdi abattandyrý qaǵıdalaryn buzǵany úshin aýdannyń 495 turǵyny ákimshilik jaýapkershilikke tartylǵan.
Buǵan deıin Atyraýda 86 memlekettik organ basshysy ákimshilik jaýapqa tartylǵanyn jazǵan edik.
