Atyraýda zańsyz balyq aýlaǵandarǵa 40 mln teńgeden astam aıyppul salyndy
ATYRAÝ. KAZINFORM – Atyraý oblysynda jyl basynan beri zańsyz balyq aýlaýǵa qatysty 2433 quqyq buzýshylyq anyqtaldy. Zańsyz aınalymnan 8 tonnaǵa jýyq balyq tárkilengen. Bul týraly Jaıyq-Kaspıı oblysaralyq basseındik balyq sharýashylyǵy ınspektsııasy málimdedi.
Inspektsııanyń aqparatyna súıensek, bıyl 10 aıda anyqtalǵan quqyq buzýshylyqtar boıynsha 170 materıal sotqa joldanǵan. Sondaı-aq QR UQK Shekara qyzmetimen birlesken reıdter barysynda 130-ǵa jýyq zań buzýshylyqtyń joly kesilgen.
Balyq qorǵaý zańnamasyn buzǵandarǵa jalpy somasy 40 mln teńgeden astam aıyppul salynǵan. Budan bólek, 3 314 balyq aýlaý quraly, 5 avtokólik jáne 171 júzý quraly tárkilengen.
– Ózen arnalary men teńiz akvatorııasynda brakonerlik aý-quraldaryn anyqtap, sý aıdyndaryn tazartý úshin kún saıyn aralaý jumysy júrgiziledi. Sonymen qatar Atyraý jáne Batys Qazaqstan oblystaryndaǵy negizgi sý aıdyndarynan bólinip qalǵan, balyqtardyń qyrylý qaýpi bar kólshikterden shabaqtar qutqarylyp jatyr.Búginge deıin 46 mln 400 myńnan astam shabaq qutqaryldy, – dedi Jaıyq-Kaspıı oblysaralyq basseındik balyq sharýashylyǵy ınspektsııasynyń baspasóz hatshysy Rústembek Qorqytov.
Buǵan deıin Shyǵys Qazaqstan oblysynda 2026 jyldyń basynan beri sý aıdyndarynda balyq aýlaý kezinde jeti adam qaza bolǵanyn jazǵan edik.
