Atyraýda zańsyz aınalymnan 11 myńnan astam qorap temeki tárkilendi
ATYRAÝ. KAZINFORM — Atyraý qalasynda aktsızdeletin temeki ónimderiniń zańsyz aınalymyna qarsy júrgizilgen is-sharalar barysynda sáıkestendirý quraldarynsyz jáne esepke alý-baqylaý markalarynsyz satylǵan 11 719 qorap temeki ónimi anyqtaldy.
Atyraý qalasy boıynsha Memlekettik kirister basqarmasynyń málimetinshe, reıdtik is-sharalar nátıjesinde zańsyz temeki ónimderin satýmen aınalysqan 3 salyq tóleýshi anyqtalǵan.
Tekserý barysynda tárkilengen temeki ónimderiniń jalpy sany 11 719 qorapty qurady. Al olardyń jalpy quny 5 mln 481 myń 300 teńgege baǵalanǵan. Atalǵan faktiler boıynsha jınalǵan ákimshilik is materıaldary sheshim qabyldaý úshin Atyraý qalasynyń mamandandyrylǵan ákimshilik quqyq buzýshylyqtar jónindegi sotyna joldandy. Memlekettik kirister organdary aldaǵy ýaqytta da kóleńkeli ekonomıkanyń aldyn alý maqsatynda aktsızdeletin ónimderdiń zańsyz aınalymyn anyqtaý jáne jolyn kesý baǵytyndaǵy baqylaý is-sharalaryn jalǵastyratynyn málimdedi.
Buǵan deıin Óskemende jyl basynan beri 1,5 tonnaǵa jýyq zańsyz alkogol tárkilengenin jazǵan edik.
