Atyraýda zańdy tulǵalar úshin káriz tarıfi 62 paıyzǵa ózgerýi múmkin
ATYRAÝ. KAZINFORM – Atyraý oblysynda aýyz sý men sarqyndy sý qyzmetteriniń tarıfin kóterý usynyldy. Másele Ulttyq ekonomıka mınıstrligi Tabıǵı monopolııalardy retteý komıtetiniń Atyraý oblysy boıynsha departamenti uıymdastyrǵan jarııa tyńdalymda talqylandy.
«Atyraý oblysy Sý Arnasy» KMK eń aldymen sýdy taratý jelileri men magıstraldyq qubyrlar arqyly berý qyzmetiniń tarıfin ózgertýdi usynyp otyr. Usynysqa sáıkes, jeke tulǵalar úshin aýyz sý tarıfi tekshe metrine 99 teńgeden 110 teńgege deıin ósýi múmkin.
Al zańdy tulǵalar úshin aýyz sý tarıfin 394 teńgeden 493 teńgege deıin kóterý josparlanǵan.
Kommýnaldyq mekeme ókilderiniń aıtýynsha, tarıfti kóterýge reagentterdiń qymbattaýy, elektr energııasy shyǵyndarynyń artýy jáne jalaqynyń azdyǵy sebep bolyp otyr. Sýdy tazartýǵa qoldanylatyn reagentterdiń baǵasy 2023 jyldan beri 2,5 esege ósken. Onyń 90 paıyzy Reseıden jetkiziledi.
– Elektr energııasy, gaz, ystyq sý salasyndaǵy óndiristik qyzmetkerlerdiń ortasha jalaqysy – 406 myń teńge. Al bizde – 280 myń teńge. Aıyrmashylyqty kórip otyrsyzdar. Bul qyzmetkerlerdiń basqa salaǵa aýysýyna, turaqsyzdyqqa alyp kelip otyr, – dedi «Atyraý oblysy Sý Arnasy» KMK basshysy Meıirim Qalaýı.
Onyń aıtýynsha, sońǵy 9 aıda kommýnaldyq mekeme elektr energııasy úshin 175 mln teńge shyǵynǵa batqan. Byltyr kásiporynnan 141 qyzmetker jumystan shyqqan.
Sonymen qatar, mekeme sýlardy burý jáne sarqyndy sýlardy tazartý qyzmetiniń tarıfin de kóterýdi usynyp otyr. Atap aıtqanda, zańdy tulǵalar úshin tarıfti 208 teńgeden 337 teńgege deıin ósirý josparlanǵan. Bul – 62 paıyzdyq ósim.
Mekeme basshylyǵy muny qalada árisi 1960 jyldary jumysyn bastaǵan, kúrdeli jóndeýge suranyp turǵan 4 káriz sorǵy stantsııasyn jańǵyrtý qajettigimen túsindirdi. Bul jumystarǵa shamamen 6,5 mlrd teńge qajet.
– Bul jumysty tarıf esebinen iske asyrǵymyz keledi. Naqtyraq aıtqanda, «Báıterek» holdıngi arqyly nesıe alyp, sol qarajatqa 6,5 mlrd teńgege osy jumystardy júzege asyrǵymyz keledi. Budan bólek, oblystyq bıýdjet esebinen 23 káriz sorǵy stantsııasyn kúrdeli jóndeýge arnalǵan jobalyq-smetalyq qujattamalar ázirlendi. Qarajat kózine qaraı kezeń-kezeńimen iske asyrylady, – dedi Meıirim Qalaýı.
Endi tarıfterge qatysty sońǵy sheshimdi tabıǵı monopolııalardy retteý departamenti qabyldaıdy. Vedomstvo barlyq usynys pen negizdemeni saralap, maýsym aıynyń basynda qorytyndy shyǵarmaq. Eger usynys maquldansa, jańa tarıfter shilde aıynan bastap kúshine enýi múmkin.
Buǵan deıin Astanada elektr jaryǵynyń tarıfi ózgerýi múmkin ekenin jazǵan edik.
