Atyraýda vokzal mańyndaǵy kásipkerler saýda oryndaryn bosatýǵa qarsy
ATYRAÝ. KAZINFORM — Atyraýda temirjol vokzaly aýmaǵynda jumys istep kelgen kásipkerler saýda oryndaryn bosatý týraly habarlama alǵannan keıin alańdaýshylyq bildirip otyr. Olardyń aıtýynsha, nysandardy kóshirýge nebári on kún ýaqyt berilgen.
Kásipkerlerdiń sózinshe, kópshiligi dúńgirshekterdi ornatý úshin nesıe alyp, qomaqty qarajat jumsaǵan. Endi qysqa merzim ishinde saýda oryndaryn bosatý týraly talap olardyń jumysyna jáne qarjylyq jaǵdaıyna keri áser etýi múmkin.
— Árqaısymyz 10-15 mıllıon teńgege deıin qarjy saldyq. Qystyń sýyǵynda jumys istep, kásipti jolǵa qoıdyq. Onyń ústine nesıe aldyq. Endi sonyń bárin kim óteıdi? On kún ishinde bosatyp shyǵýymyz kerek degen habarlama aldyq. Munyń zańdylyǵyn qarastyrýdy suraımyz, — deıdi kásipker Gúlnar Sheketaeva.
Kásipkerler dúńgirshekterdi buzbaýdy jáne ózderine balama oryn usynýdy talap etip otyr. Olardyń pikirinshe, qazirgi jaǵdaıda saýda núktelerinen aıyrylý nesıe tólemderin óteýge aıtarlyqtaı qıyndyq týǵyzady.
— Bankterden alǵan nesıelerimiz bar. Olardy tórt-bes jyl boıy tóleýimiz kerek. Salyq tólep otyrmyz, jumysshylarymyz bar. Eger bul oryndar jabylsa, barlyǵy ótemsiz qalady. Sondyqtan jergilikti bılikten jaǵdaıymyzdy nazardan tys qaldyrmaı, qoldaý kórsetýdi suraımyz, — deıdi kásipker Samal Ábdirova.
Al jaýapty mekemelerdiń málimetinshe, qazirgi ýaqytta temirjol vokzalynda aýqymdy qaıta jańǵyrtý jumystary júrip jatyr. Joba aıasynda ǵımarattyń ishki jáne syrtqy kelbeti tolyq jańartylmaq.
«Qazaqstan temir joly» ulttyq kompanııasy Atyraý magıstraldyq jeli bólimshesi fılıalynyń dırektory Aralbaı Qosymbaevtyń aıtýynsha, saýda nysandary qurylys jumystaryna kedergi keltirip otyr. Jospardan keshigý máselesi de bar.
— Eń bastysy — qaýipsizdik. Qazir bul aýmaqta aýqymdy qurylys júrip jatyr. Merdiger uıymdar men tehnıkalyq qadaǵalaý mamandarynan jumystarǵa kedergi keltirip otyrǵany jóninde hattar keldi. Keıbir tehnıkalar qurylys alańyna óte almaı tur. Bolashaqta jańa vokzal paıdalanýǵa berilgen kezde mundaı pavılondar qarastyrylady. Sol kezde kásipkerler konkýrsqa qatysyp, óz oryndaryn ala alady, — dedi ol.
Jospar boıynsha vokzal ǵımaratyn jańǵyrtý jumystary 2028 jyly aıaqtalýy tıis.
Al kásipkerler ázirge jergilikti atqarýshy organdardyń aralasyp, ózderine basqa oryn taýyp berýin surap otyr.
Jalpy óńirde 9 temirjol vokzaly jańartylyp jatyr.
