Atyraýda balabaqshalarda qarjy tapshylyǵy týyndady

ATYRAÝ. KAZINFORM – Atyraýda shamamen 70-teı balabaqsha qyzmetkeri sońǵy úsh aı boıy eńbekaqysyn ala almaı júr. Áleýmettik jelilerde taraǵan aqparatqa sáıkes, tárbıeshilerdiń kóbi nesıeleri men ózge de qarjylyq mindettemelerin ýaqytyly óteı almaı, qıyn jaǵdaıǵa tap bolǵan.

Bul jaǵdaıǵa baılanysty Kazinform tilshisine Atyraý oblysy Bilim berý basqarmasy túsinikteme berdi.

Atyraý oblysy Bilim berý basqarmasy 2025 jyldyń qazan aıynan bastap qaladaǵy bes balabaqshany vaýcherlik qarjylandyrýdyń pılottyq jobasynan shyǵarý týraly sheshim qabyldaǵan.

– Atyraý qalasyndaǵy №20 «Altyn balyq», №8 sanatorııalyq «Aqbota» bóbekjaı-balabaqshalary jáne kúrdeli jóndeýdi qajet etetin №28 «Almagúl», №37 «Bolashaq», №48 «Rodnıchek» balabaqshalary vaýcherlik júıeden shyǵarylady, – delingen basqarma habarlamasynda.

Sondaı-aq vaýcherlik júıe boıynsha qarjy naqty qabyldanǵan balalar sanyna qaraı bólinetindikten, bul mekemeler tolyqqandy qarjylandyrý ala almaı kelgen.

– QR Bilim týraly zańynyń 62-babynyń 1-tarmaǵyna sáıkes joǵaryda atalǵan uıymdar vaýcherlik qarjylandyrý júıesinen shyǵaryldy, – delingen resmı aqparatta.

Buǵan deıin elimizde balabaqsha kezegi úsh ese qysqarǵanyn aıtqanbyz.

Sonymen qatar elimizdegi jekemenshik balabaqshalardyń qyzmet kórsetý quny qansha ekenin jazǵanbyz.