Atyraýda úıiniń aınalasyn taza ustamaǵan 419 turǵyn jaýapqa tartyldy
ATYRAÝ. KAZINFORM – Atyraý oblysynda úıi men ǵımaratynyń aınalasyn talapqa saı kútip ustamaǵan 419 adam ákimshilik jaýapkershilikke tartyldy. Polıtseılerdiń málimetinshe, turǵyndardyń kóbi úı mańyn qoqystan tazalamaý, aramshópti ormaý jáne abattandyrý qaǵıdalaryn saqtamaý deregi boıynsha zań aldynda jaýap bergen.
Atyraý oblystyq Polıtsııa departamentiniń aqparatyna súıensek, ákimshilik jaýapkershilikke tartylǵandardyń 11-i – jeke kásipker.
Eskertýge qaramastan talapty oryndamaǵan azamattarǵa Ákimshilik quqyq buzýshylyq týraly kodekstiń 505-baby boıynsha jalpy somasy 500 myń teńgeden astam aıyppul salynǵan. Tártip saqshylarynyń aıtýynsha, abattandyrý qaǵıdalaryna sáıkes menshik ıeleri óz úıiniń nemese ǵımaratynyń aınalasyndaǵy 5 metrge deıingi aýmaqty taza ustaýǵa mindetti. Bul talapqa qoqysty tazalaý, aramshópti shabý kiredi. Sondaı-aq aýlaǵa qurylys qaldyqtary men otyn úıip qoıýǵa, avtoturaq ornyn qorshap, jeke menshik retinde paıdalanýǵa tyıym salynady.
- Quqyq buzýshylyq alǵash anyqtalǵanda eskertý jasalady. Al talap qaıta buzylsa, jeke tulǵalarǵa 20 aılyq eseptik kórsetkish mólsherinde aıyppul salynyp, qaıtalanǵan jaǵdaıda onyń kólemi eki ese ulǵaıady. Bul talap zańdy tulǵalarǵa, jeke kásipkerler men sharýa qojalyqtaryna da ortaq, - dedi Atyraý oblystyq PD Qoǵamdyq qaýipsizdik basqarmasynyń aǵa ınspektory Nurbolat Sahıpov.
Aıta keteıik, 1 shildeden bastap Qazaqstanda qalalar men eldi mekenderdiń aýmaqtaryn abattandyrýdyń úlgilik qaǵıdalaryna ózgerister engizildi. Endi turǵyndar óz úıiniń aınalasyndaǵy 5 metr radıýstaǵy aýmaqtyń tazalyǵyn qamtamasyz etýge mindetti.
Buǵan deıin Atyraýda zańsyz qoqys úıindileri úshin 7 ákim jaýapqa tartylǵan edi.
