Atyraýda úıiniń aýlasyna 47 túp qarasora ekken zeınetker ustaldy

ATYRAÝ. KAZINFORM – Atyraýda 64 jastaǵy zeınetker úıiniń aýlasyna 47 túp qarasora ósirgen. Onyń salmaǵy – 8,8 keli. 

Atyraý oblystyq polıtsııa departamentiniń baspasóz qyzmetinen málim etkendeı, kúdikke ilingen zeınetker «Qarasora» jedel izdestirý is-sharasy kezinde ustalǵan.

«Bıyl Qarasora – 2024» arnaıy operatsııasy kezinde polıtseıler 58 esirtki qylmysynyń jolyn kesti. Al, búgin polıtsııa jáne prokýratýrasy qyzmetkerleriniń birlesken is-sharasy kezinde zeınetkerdiń turǵylyq úıiniń aýlasyna 47 túp qarasora ósirgeni anyqtaldy. Ol turǵylyqty turatyn úıiniń qorshaýyn aýlasy kórinbeıtindeı etip jabdyqtaǵan. Tártip saqshylarynyń tintý júrgizýi kezinde aýladan 8 keli 800 gramm bolatyn 47 túp qarasora butasy tárkilendi», - dep habarlady departamenttiń baspasóz qyzmeti.

Qazir kúdiktige qatysty qylmystyq is tirkeldi. Sotqa deıingi tergeý amaldary júrgizý bastaldy. Ózge aqparat tergeý múddesine sáıkes jarııalaýǵa jatpaıdy.

Eske sala ketelik, buǵan deıin Atyraýda esirtki taratýmen aınalysqan eki kúdikti qylmys ústinde ustalǵanyn jazǵan edik.