Atyraýda úıge terezeden kirip, altyn men aqsha urlaǵan 2 kúdikti ustaldy

ATYRAÝ. KAZINFORM – Atyraýda 2 jigit jeke ıeliktegi turǵyn úılerge terezeden kirip, altyn buıymdar men aqsha urlaǵan. Kúdiktilerdiń osyndaı 3 qylmysqa qatysy bary anyqtalyp otyr. Atyraý oblystyq polıtsııa departamentiniń baspasóz qyzmetinen málim etkendeı, kúdiktiler urlaǵan altyn áshekeılerdi lombardqa tapsyrǵan.

– Atyraý qalalyq polıtsııa basqarmasyna qarasty №2 polıtsııa bólimi krımınaldyq polıtsııa bólimshesiniń qyzmetkerleri birneshe turǵyn úıdiń plastıkalyq terezeden ashyp, baǵaly zattardy, altyn buıymdar men ártúrli kýpıýradaǵy aqshany urlaǵan eki kúdiktini ustady. Tekserý barysynda kúdiktiler urlaǵan altyn buıymdardy Atyraý qalasynyń aýmaǵynda ornalasqan lombardqa tapsyrǵany belgili boldy. Kúdiktilerdiń osyǵan uqsas 3 qylmysqa qatysy bary anyqtaldy, - dep habarlady departamenttiń baspasóz qyzmeti.

Qazir eki kúdiktige qatysty sotqa deıingi tergep-tekserý bastaldy. 

– Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy. QR Konstıtýtsııasynyń 77-baby 3-tarmaǵynyń 1-tarmaqshasy, QR Qylmystyq-protsestik kodeksiniń 19-babynyń 1-bóligine sáıkes adamnyń kináli ekendigi zańdy kúshine engen sot úkimimen tanylǵansha jasaǵan qylmysqa kináli emes dep esepteledi, - dep málim etti departamenttiń baspasóz qyzmetinen.

Eske sala ketelik, budan buryn Atyraýda 46 jastaǵy áıeldi óltirgen kúdikti qamaýǵa alynǵanyn jazǵan edik.