Atyraýda úıden oqıtyn múgedek balalarǵa járdemaqy tólenbeı kelgen

ATYRAÝ. KAZINFORM – Atyraý prokýrorlary jyl basynan beri 200-den astam jasóspirimniń quqyǵyn qorǵady. Úıden oqıtyn 7 múgedek balaǵa járdemaqy tólengen.

Atyraý oblysy prokýratýrasynyń málimetinshe, kámeletke tolmaǵandardyń quqyqtary men zańdy múddelerin qorǵaýǵa basymdyq berilip otyr. 

– Jyl basynan beri Atyraý qalasynyń prokýratýrasy 200-den astam balanyń quqyqtaryn qorǵady. Jergilikti atqarýshy organdar men polıtsııanyń 24 qyzmetkeri tártiptik jaýaptylyqqa tartyldy. Polıtsııa qyzmetkerleri kámelet jasyna tolmaǵandarǵa qatysty qorǵaýshynyń qatysýynsyz ákimshilik hattamalar jasaqtaǵan. Prokýratýranyń narazylyǵy negizinde 197 hattamanyń kúshi joıyldy, - dep habarlady oblystyq prokýratýradan. 

Sondaı-aq prokýratýranyń qadaǵalaýynyń nátıjesinde jetim jáne múgedektigi bar balalardyń konstıtýtsııalyq quqyqtary qorǵalǵan.

– Úıden oqıtyn múgedek balalarǵa járdemaqy tólenbegen. Zańmen belgilengen normalarǵa sáıkes jetim balalardy memlekettik turǵyn úı qorynan beriletin úı kezegine qoımaǵany týraly derekter anyqtalyp otyr. Prokýrorlyq qadaǵalaý aktileri negizinde 3 jetim bala turǵyn úı alý kezegine turǵyzyldy. Úıden oqıtyn 7 múgedektigi bar balaǵa járdemaqy tólendi, -dep málim etti oblystyq prokýratýradan. 

Qadaǵalaý organynyń qyzmetkerleri teris mazmundy jáne óz-ózine qol jumsaý, esirtki quraldaryn nasıhattaıtyn 85-ten astam zııandy ınternet-saıtty, chattar men áleýmettik jelidegi paraqshalardy buǵattady.

Eske sala ketelik, buǵan deıin Atyraýda zardap shekken úleskerdiń paıdasyna jer telimderi qaıtarylatynyn habarlaǵan edik.