Atyraýda ústine eskertkish qulaǵan búldirshinniń ólimine kináli adam sottaldy
ATYRAÝ. KAZINFORM — Atyraýda 2024 jylǵy maýsymda ústine eskertkish qulaǵan 7 jasar qyz aýrýhanada kóz jumdy. Al 9 jasar aǵasynyń qoly synǵan.
Qaıǵyly oqıǵa byltyr maýsym aıynyń sońǵy onkúndiginde bolǵan. Atyraý qalasyndaǵy «Jeńis» saıabaǵyna serýendeýge kelgen bir otbasynyń eki balasy qulaǵan eskertkishtiń saldarynan zardap shekken.
Jergilikti polıtsııa qyzmetkerleri atalǵan oqıǵaǵa baılanysty qylmystyq is qozǵady. Qylmystyq is Atyraý qalasyndaǵy № 2 sotta qaraldy. Eskertkishti ornatqan B.-ǵa QR Qylmystyq kodeksiniń 306-babynyń 3-bóligimen aıyp taǵylǵan.
— Ákimdik Atyraý qalasyndaǵy «Jeńis» saıabaǵynda UOS batyrlaryna arnalǵan 14 músin jasaý úshin demeýshiler men merdigerlerdi tartqan. Aıyptalýshy merdiger bola tura músinder jasaý kezinde qurylys normalaryn buzǵan. Nátıjesinde músinniń bireýi eki jas bala men olardyń ákesiniń ústine qulaǵan, — dep habarlady sottan.
Sot aıyptalýshynyń áreketi QR Qylmystyq kodeksiniń 306-babynyń 3-bóliginen 279-babynyń 1-bóligimen (Sáýlet, qala qurylysy jáne qurylys qyzmeti salasyndaǵy qaǵıdalardy nemese normatıvterdiń talaptaryn abaısyzda adam ólimine nemese ózge de aýyr zardaptarǵa ákep soqqan buzý) qaıta saralady. Al aıyptalýshynyń kinási kýágerlerdiń aıǵaqtarymen, beınejazbalarmen, sarapshynyń qorytyndysymen dáldengen.
Prokýror sottalýshyny 4 jylǵa bas bostandyǵynan aıyrý týraly usynys bildirdi. Alaıda, sottalýshy kinásin moıyndamady. Al jábirlenýshiler qatań jaza taǵaıyndaýdy surady.
— Sot úkimimen B. esimdi azamat QR Qylmystyq kodeksiniń 279-babynyń 1-bóligimen kináli dep tanyldy. Oǵan sáýlet, qala qurylysy jáne qurylys qyzmetimen aınalysý quqyǵynan 3 jyl, bas bostandyǵyn 3 jyl merzimge aıyrý jazasy taǵaıyndaldy. Raqymshylyq jasaý aktisi negizinde 1 jyl 6 aı merzimge bas bostandyǵynan aıyrý túrindegi túpkilikti jaza belgilendi. Sottalýshydan árbir jábirlenýshiniń paıdasyna moraldyq zııannyń ótemaqysy retinde 10 mln teńgeden, emdelýge jumsalǵan shyǵyndar óndirip alyndy, — dep málim etti atalǵan sottan.
Sot úkimi zańdy kúshine engen joq.
Eske sala keteıik, byltyr Atyraýda ústine eskertkish qulaǵan 7 jasar qyz qaıtys bolǵanyn habarlaǵan edik.
Sondaı-aq, qulaǵan eskertkishtiń saldarynan 9 jasar balanyń qoly synǵanyn jazǵan bolatynbyz.