Atyraýda ustaz kabınetin áktep, tazalaýǵa májbúr bolǵan
ATYRAÝ. KAZINFORM — Atyraýdaǵy N.Tilendıev atyndaǵy kishi óner akademııasynyń muǵalimi áleýmettik jelide kabınet jóndeý men tazalyq jumystaryna tartylǵanyn aıtyp, shaǵymdandy.
Pedagogtiń sózinshe, ol bir apta boıy kabınetti tazalap, qabyrǵalaryn áktegen. Keıin odan plafondardy súrtý de talap etilgen. Oqıǵaǵa qatysty oblystyq bilim basqarmasy tekserý júrgizetinin habarlady.
N.Tilendıev atyndaǵy kishi óner akademııasy — daryndy balalarǵa arnalǵan ınternattyq mekemesi bar mamandandyrylǵan mektep.
Jazba avtorynyń aıtýynsha, oǵan ózi sabaq beretin kabınetti retke keltirý jáne jóndeý jumysy júktelgen.
Pedagog bastapqyda janjal týyndaǵanyn qalamaǵandyqtan, jumysty oryndaǵanyn jazǵan. Onyń sózinshe, kabınet óte nashar jaǵdaıda bolǵandyqtan, oqýshylary men ata-analarynyń aldynda yńǵaısyzdanǵan.
Muǵalim bir apta boıy eden jýyp, shań súrtip, qabyrǵalardy áktegenin aıtqan. Onyń jazbasyna qaraǵanda, jumys kún sońynda qatty fızıkalyq sharshaýyna sebep bolǵan. Alaıda pedagogtiń aıtýynsha, jóndeý jumystary aıaqtalǵannan keıin de oǵan kabınettegi usaq-túıek kemshilikterdi túzetý týraly tapsyrmalar berilgen. Sonyń biri — plafondardaǵy shańdy súrtý.
Muǵalim bul jumysty oryndaýdan bas tartqanyn jazdy. Sebebi plafondardy tazalaý úshin baspaldaqqa shyǵyp, elektr qurylǵylarymen jumys isteý qajet bolǵan. Pedagogtiń aıtýynsha, oǵan ákimshilik tarapynan «úıde lıýstra jýasyz ba?» degen mazmunda jaýap berilgen.
Shaǵym avtory muǵalimniń negizgi mindeti — bilim berý ekenin alǵa tartady. Ol kásibı biliktiligin arttyryp, oqýshylaryn túrli baıqaýlar men kórmelerge daıyndaıtynyn, shákirtteriniń jetistikteri bar ekenin jazǵan.
— Men jumys isteýden bas tartpaımyn. Tek mamandyǵyma qatysy joq ári qaýipti bolýy múmkin jumysty oryndaýǵa kelispeımin, — deıdi pedagog.
Áleýmettik jelidegi jazbaǵa baılanysty Atyraý oblysynyń bilim berý basqarmasy jaǵdaıdy nazarǵa alǵan. Basqarmanyń habarlaýynsha, pedagogterdiń bilim berý nysandaryn jańa oqý jylyna daıyndaý jumystaryna tartylýyna qatysty aqparat boıynsha tıisti zerdeleý júrgiziledi.
— Zerdeleý nátıjesinde qoldanystaǵy eńbek zańnamasynyń talaptary buzylǵany anyqtalǵan jaǵdaıda, zańnamaǵa sáıkes tıisti sharalar qabyldanady, — delingen basqarma habarlamasynda.
Vedomstvo pedagogterdiń eńbek quqyqtarynyń saqtalýyn qamtamasyz etý máselesin erekshe baqylaýda ustaıtynyn atap ótti.
Buǵan uqsas jaǵdaı Almatyda da tirkelgen edi. Keıin muǵalimderdiń qyzmetinen tys jumysqa tartylýyna baılanysty tekseris bastaldy.
