Atyraýda úshkir zatpen jaralanǵan oqýshynyń jaǵdaıy qalaı
ATYRAÝ. KAZINFORM – Atyraý qalasyndaǵy mektepterdiń birinde úshkir zattan jaraqat alǵan 8-synyp oqýshysy jansaqtaý bóliminen jalpy palataǵa aýystyryldy. Bul týraly oblystyq balalar aýrýhanasynyń ókilderi málimdedi.
Oblystyq balalar aýrýhanasy dırektorynyń orynbasary Erjan Esbolaevtyń aıtýynsha, qyz bala aýrýhanaǵa túsken kezde oǵan shuǵyl ıntensıvti terapııa júrgizilgen.
— Bala jaraqatpen túskende shuǵyl ıntensıvti terapııa júrgizildi. Qazir patsıenttiń jaǵdaıy turaqty, ortasha aýyr jaǵdaıda dep baǵalanyp otyr. Patsıent anasymen birge jalpy palataǵa shyǵaryldy. Denesinde aýyrlyq týdyratyn jaraqattar bar. Keýde kletkasy, qoly jáne moıyn aımaǵy jaraqattanǵan, — dedi Erjan Esbolaev.
13 qańtar tústen keıin Atyraý qalasyndaǵy mektepterdiń birinde 9 synypta oqıtyn oqýshy 8 synyptaǵy qyzdy úshkir zatpen jaraqattaǵan edi.
Osy jaǵdaıdan keıin mektep qaýipsizdik sharalaryn kúsheıtip, ata-analarmen jınalys ótkizgen.
Binom Atyrau JShS dırektorynyń ýaqytsha mindetin atqarýshy Ónerbek Erǵalıevtiń aıtýynsha, mektepte oqýshylardyń sómkesin tekserýge zań boıynsha ruqsat joq.
— Zań boıynsha oqýshylardyń sómkelerin tekserýge quqyǵymyz joq. Ul bala akademııalyq úlgerimi tómen oqýshylardyń tiziminde bolǵan. Alaıda psıhıkalyq aýytqýy nemese tártibi boıynsha arnaıy esepte turǵan joq. Qazir qaýipsizdik sharalary kúsheıtildi. Mektep aldyndaǵy baqylaý pýnktterine metall detektorlaryn ornatý josparlanyp otyr, — dedi Ónerbek Erǵalıev.
Eske salaıyq, bul oqıǵaǵa qatysty polıtsııa departamenti qylmystyq is qozǵady.
Buǵan deıin Atyraýda 58 jastaǵy muǵalimdi kúıeýi pyshaqtap óltirgenin jazǵan edik.
