Atyraýda úshem dúnıege keldi
ATYRAÝ. KAZINFORM – Jas otbasy bir ul men eki qyzdyń ata-anasy atandy.
Atyraý oblystyq perınataldyq ortalyǵynyń dırektory Qazbek Ermaǵambetovtiń aıtýynsha, úshemdi dúnıege ákelgen 26 jastaǵy Bekzada Qadyrbaevaǵa júktiliktiń 33 aptasynda ota jasalǵan.
Perınataldyq ortalyq dırektorynyń orynbasary Gúlmıra Ábekeevanyń aıtýynsha, bul – jas otbasynyń tuńǵysh perzentteri. Jas otbasy sábılerine Abdýl Hakım, Hafıza, Habıba esimin bergen.
«Úshemniń bireýi – ul, ekeýi – qyz. Sábıler ártúrli salmaqpen ómirge keldi. Báriniń de salmaǵy 2 kelige jetpedi. Biri – 1 711, ekinshisi – 1 823, úshinshisiniń salmaǵy 1 420 gramm boldy. Náresteler shala týǵanyna baılanysty jansaqtaý bóliminde jasandy jeldetý qurylǵysyna qosyldy. Osy bólimde tolyqqandy em aldy. Perzenthanada jaǵdaıy turaqtalyp, tynys alýy jaqsarǵanǵa deıin 37 kún jatty. Sonan soń úıine shyǵaryldy. Qazir sábılerdiń salmaǵy ulaıyp, 1 700, 2 400, 2 500 grammǵa jetti», - deıdi Gúlmıra Ábekeeva.
«Azamattarǵa arnalǵan úkimet» memlekettik korporatsııasy KE AQ Atyraý oblysy boıynsha fılıaly dırektorynyń orynbasary Nurlan Dúısembaev úshemniń týý týraly kýáligin tabys etti. Al, oblystyq perınataldyq ortalyǵynyń dırektory Qazbek Ermaǵambetov úshemniń áke-sheshesine ortalyq atynan arnaıy sertıfıkat tabystady.
Eske sala ketelik, buǵan deıin Atyraýda 20 mıllıonynshy turǵyn bolyp dúnıege kelgen sábıdiń Muhammad esimi berilgen edi.
