Atyraýda úsh jigitten sholaq myltyq pen tapansha, túrli kalıbrli oq-dári tárkilendi
ATYRAÝ. KAZINFORM — Atyraý polıtseıleri atys qarýyn zańsyz saqtaǵan úsh jigitti ustady. Olardan sholaq myltyq pen tapansha, oq-dári tárkilendi. Biriniń kóliginen tapansha tabylǵan.
Atyraý oblystyq polıtsııa departamenti baspasóz qyzmetiniń málimetinshe, qarýdy zańsyz saqtaý deregi uıymdasqan qylmysqa qarsy kúres basqarmasynyń qyzmetkerleri júrgizgen jedel-izdestirý is-sharasy kezinde anyqtalǵan.
«Polıtsııa qyzmetkerleri 19 jastaǵy jigittiń turǵylyqty meken-jaıyn tekserý barysynda «BM» markaly 16 kalıbrli jáne «IJ-58» markaly 12 kalıbrli qosaýyzdy sholaq myltyqty, 5,6 kalıbrli 35 dana jáne 12 kalıbrli 23 dana patrondardy, 12 kalıbrli 8dana, 9 mm 1 dana gılzany tárkiledi. Al, Qulsary qalasynda 29 jastaǵy turǵynnan «BM» markaly qońyr tústi uńǵysy kesilgen sholaq myltyq tabyldy. Lada Priora avtokóligin toqtatyp, 21 jastaǵy júrgizýshiden Retay markaly tapanshasy tabyldy», - dep habarlady departamenttiń baspasóz qyzmeti.
Qazir polıtsııa qyzmetkerleri atalǵan derekterge qatysty QR Qylmystyq Kodeksiniń 287-babynyń 2-bóligimen sotqa deıingi tergep-tekserýdi júrgizip jatyr.
Ózge aqparat QR Qylmystyq kodeksiniń 201-babyna sáıkes jarııalaýǵa jatpaıdy.
Eske sala ketelik, budan buryn Atyraýda da mektepterge shabýyl jasalatyn týraly jalǵan aqparat taraǵanyn habarlaǵan bolatynbyz.
