Atyraýda úsh kúnde aılyq normadan 1,5 ese kóp jańbyr jaýdy
ATYRAÝ. KAZINFORM — Atyraýda 1–3 maýsym aralyǵynda aılyq jaýyn-shashyn normasynan 1,5 esege artyq jańbyr jaýdy.
Qalada sońǵy úsh kúnde aqjaýyn, sirkireme jáne ortasha deńgeıdegi nóser boly. Osy ýaqyt ishinde jalpy 27 mm jaýyn-shashyn túsken. Mamandardyń málimetinshe, maýsym aıyndaǵy ortasha jaýyn-shashyn normasy 17 mm bolyp belgilengen.
Jaýyn-shashynnan keıin qala kóshelerinde jınalǵan sýdy tazartý jumystaryna qatysty ótinish sany kóbeıdi. 109 biryńǵaı baılanys ortalyǵynyń málimetinshe, 1 maýsymnan qazirgi ýaqytqa deıin 439 ótinish túsken. Onyń 217-si oryndalypty.
Atyraý qalasy ákimdiginiń málimetinshe, «Arnaýly Avtobaza» mekemesiniń qyzmetkerleri táýlik boıy sý sorý jumystaryn júrgizip jatyr.
— Qazir qaladaǵy negizgi kósheler, aryqtar, áleýmettik nysan aýmaqtarynda sý sorý jumysy júrgizilip jatyr. Turǵyndardyń da ótinishi qamtylyp jatyr. Bul jumysqa barlyǵy 35 tehnıka jumyldyrylǵan. Osy úsh kún ishinde qala aýmaǵynan 20 myń tekshe metr kóleminde sý jınalyp, syrtqa shyǵaryldy, - dedi qalalyq ákimdiktiń baspasóz hatshysy Erkenaz Qalıjan.
Aýa raıy boljamyna sáıkes, óńirde turaqsyz aýa raıy aldaǵy kúnderi de saqtalady. Sınoptıkterdiń aıtýynsha, atmosferalyq protsesterdiń belsendiligi birtindep báseńdegenimen, jaýyn-shashyn tolyq toqtamaıdy.
Mamandardyń málimetinshe, apta sońyna qaraı jaýyn-shashyn mólsheri azaıa bastaıdy. Soltústik-batystan jáne batystan soǵatyn jeldiń ekpini kúsheıip, sekýndyna 15–20 metrge deıin jetýi yqtımal. Aýa temperatýrasy da qubylmaly sıpatta bolady. Túnde aýa raıy 10–15 gradýs jyly aralyǵynda saqtalsa, kúndiz 18–23 jáne 20–25 gradýs aralyǵynda aýytqıdy. Aptanyń sońyna qaraı kún raıy birtindep jylyp, 25–30 gradýsqa deıin kóteriledi dep kútilýde.
— Apta sońyna qaraı jaýyn-shashyn birtindep azaıady, batys jáne ońtústik aýdandarda jańbyr saqtalady. Soltústik-batys, batystan soqqan jel baǵyty, ekpini sekýndyna 15-20 metrge deıin kúsheıedi. Aýa temperatýrasy túnde 10-15 gradýs jyly, kúndiz 18-23 pen 20-25 aralyǵynda aýytqıdy. Alaıda, aptanyń sońyna qaraı kún qaıta jylynyp 25-30 gradýsqa deıin jetedi dep boljanyp otyr, — dedi «Qazgıdromet» RMK Atyraý oblystyq fılıaly aýa raıyn boljaý bóliminiń basshysy Aına Qazǵulova.
Mamandardyń aıtýynsha, Atyraý oblysynda maýsym aıyndaǵy jaýyn-shashynnyń ortasha mólsheri 16–21 mıllımetr. Alaıda aı basyndaǵy tsıklonnyń áserinen keıbir aýdandarda aılyq normanyń edáýir bóligi qazirdiń ózinde túsip úlgergen.
Aıta keteıik, «Qazgıdromet» 3-5 maýsym aralyǵyna arnalǵan aýa raıy boljamyna sáıkes, 4 maýsymda elimizdiń batys óńirlerinde, 4-5 maýsymda soltústik-batys pen soltústik aımaqtarda, al 6 maýsymda respýblıkanyń ońtústik-shyǵysynda nóser jańbyr jaýady.
