Atyraýda úsh adamnyń ólimine sebepker bolǵan Túrkııanyń azamaty 5 jylǵa sottaldy
ATYRAÝ. KAZINFORM — Atyraý oblysynda Túrkııanyń azamaty jol-kólik oqıǵasyn jasap, úsh adamnyń ólimine sebepker bolǵan. Sot oǵan 7 jylǵa kólik júrgizý quqyǵynan, 5 jylǵa bas bostandyǵynan aıyrý jazasyn taǵaıyndady.
Túrkııa Respýblıkasynyń azamaty Mahambet aýdanyndyq sotynyń úkimimen sottalǵan. Alaıda, sottalýshynyń qorǵaýshysy sot úkimimen kelispeı, apellıatsııalyq shaǵym túsirgen.
Atyraý oblystyq sotynyń qylmystyq ister jónindegi sot alqasynda Túrkııa Respýblıkasynyń azamaty D.-ǵa qatysty úkim apellıatsııalyq tártipte qaraldy.
«Birinshi satydaǵy sot úkimimen D. jol júrisi jáne kólik quralyn paıdalaný qaǵıdalaryn buzyp, abaısyzda úsh adamnyń ólimine ákep soqqan is-áreketi úshin QR Qylmystyq kodeksiniń 345-babynyń 4-bóligimen kináli dep tanyldy. Oǵan 7 jyl merzimge kólik quralyn basqarý quqyǵynan, 5 jyl merzimge bas bostandyǵynan aıyrý jazasy taǵaıyndalǵan. Іs apellıatsııada sottalǵan D.-nyń qorǵaýshysynyń apellıatsııalyq shaǵymy boıynsha qaraldy. Qorǵaýshy sottalýshyǵa taǵaıyndalǵan jazany jeńildetýdi surady», -dep habarlady oblystyq sottyń baspasóz qyzmeti.
Birinshi satydaǵy sottyń sottalýshyǵa jaza kináni moıyndaý týraly protsestik kelisim negizinde taǵaıyndalǵanyn, protsestik kelisimniń negizdiligi tekserildi. Alqa músheleri taǵaıyndalǵan jaza merzimin tómendetýge nemese jeńildetýge negiz joq degen qorytyndy jasady.
«Sot alqasy sottalýshynyń jeke basyn zerdelep, onyń jasaǵan qylmysynyń sıpaty men dárejesin, qylmystyń zardaby úsh adamnyń ólimine ákep soqqanyn eskerdi. Birinshi satydaǵy sotpen oǵan jeke basyna, jasaǵan áreketine saı zań sheńberindegi jaza taǵaıyndalǵan degen tujyrymǵa keldi. Sot úkimin ózgertýge nemese onyń kúshin joıýǵa negizder anyqtalmady. Qylmystyq ister jónindegi sot alqasynyń qaýlysymen birinshi satydaǵy sottyń úkimi ózgerissiz, apellıatsııalyq shaǵym qanaǵattandyrýsyz qaldyryldy», -dep málim etti sottyń baspasóz qyzmeti.
Sot úkimi zańdy kúshine endi.
Eske sala ketelik, buǵan deıin Atyraýda kámeletke tolmaǵan qyzdy zorlaýǵa oqtalǵan kúdikti 17 jylǵa sottalǵanyn jazǵan edik.
