Atyraýda urlyq pen alaıaqtyq jıi tirkeledi – polıtsııa

ATYRAÝ.KAZINFORM – 2025 jyldyń qańtar-tamyz aılarynda Atyraý oblysynda 2533 qylmystyq quqyq buzýshylyq tirkeldi. Bul kórsetkish ótken jyldyń sáıkes kezeńimen salystyrǵanda 23,5 paıyzǵa tómen. Bul týraly óńirlik polıtsııa departamentiniń Kazinform tilshisiniń saýalyna bergen jaýabynda aıtylǵan.

Polıtsııa departamentiniń málimetinshe, aýyr qylmystar sany 18,9 paıyzǵa azaıyp, 788-ge jetken. Asa aýyr qylmystar boıynsha 31 derek tirkelip, ótken jylmen salystyrǵanda 46,6 paıyzǵa tómendegeni baıqalady.

Jıi tirkeletin qylmystar qatarynda urlyq pen alaıaqtyq derekteri kósh bastap tur.

Sonymen qatar oblys aýmaǵynda QR Qylmystyq kodeksiniń 262-baby boıynsha (Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý) bir qylmystyq is tergelip jatyr. Sońǵy bir jyl ishinde bir uıymdasqan qylmystyq toptyń áreketi áshkerelengen delingen habarlamada.

Kámeletke tolmaǵandarmen jáne olarǵa qarsy jasalatyn quqyqbuzýshylyqtardyń aldyn alý baǵytynda da birqatar sharalar qabyldanǵany kórsetilgen.

– Atalǵan kezeńde ishki ister bólimderine 7426 kámeletke tolmaǵan jasóspirim jetkizildi. Olardyń 7298-i ártúrli ákimshilik quqyqbuzýshylyq jasaǵan. Qazirgi tańda ishki ister organdarynyń esebinde 189 kámeletke tolmaǵan jas jáne 211 qolaısyz otbasy tur, – delingen habarlamada.

Buǵan deıin, elimizde qylmys sany 13 paıyzǵa tómendegenin jazǵanbyz.