Atyraýda ýrbanıstıka ortalyǵynyń alǵashqy mindetteri belgili boldy
ATYRAÝ. KAZINFORM — Atyraýda tamyz aıynyń sońynda qurylǵan ýrbanıstıka ortalyǵy qala kósheleri men qoǵamdyq keńistikterdi zerttep, olardy damytýǵa qatysty usynys ázirlemek.
Ortalyq «Atyraý» áleýmettik-kásipkerlik korporatsııasynyń qurylymdyq bólimshesi retinde jumys isteıdi. Jeke mekeme bolyp ashylǵan joq. Negizgi mindeti — qalanyń damýyna qatysty sheshimderdi zertteý nátıjesimen jáne turǵyndardyń qajettiligimen tolyqtyrý.
Ortalyqtyń jumysyn úılestirý úshin ýrbanıster men sáýletshilerden bólek, memlekettik organdardyń, beıindi uıymdardyń, sarapshylar qaýymdastyǵy men bıznes ókilderiniń qatysýymen konsýltatıvtik-keńesshi organ qurý kózdelgen. Ol qalaǵa arnalǵan jobalardy qarap, jetildirýge qatysty usynys ázirleıdi.
Alǵashqy kezeńde mamandar qala kóshelerin, jaıaý júrginshiler marshrýttaryn, ótkelderdiń qaýipsizdigin, qoǵamdyq keńistikterdiń jaı-kúıin, abattandyrý men kógaldandyrý múmkindikterin zerttemek. Sondaı-aq qoljetimdi orta, ınklıýzııa jáne tas joldardyń baılanysy máseleleri de qarastyrylady.
Zertteý barysynda turǵyndardyń kósheler men qoǵamdyq keńistikterdi qalaı paıdalanatyny baqylanady. Turǵyndarmen áńgimelesý jáne saýalnama arqyly olardyń kúndelikti marshrýttary, qajettilikteri men usynystary anyqtalady.
— Uzaq merzimdi maqsattyń biri — Atyraý qalasynyń master-josparyn ázirleý. Ol qalanyń bolashaq damý baǵytyn aıqyndap, adamdardyń onda qalaı ómir súretini, qozǵalatyny jáne demalatyny týraly ortaq túsinik qalyptastyrýǵa kómektesedi. Bas jospar aýmaqtyń fýnktsıonaldyq aımaqtaryn, josparlaý qurylymyn jáne kólik pen ınjenerlik ınfraqurylymnyń negizgi baǵyttaryn belgileıdi. Master-jospar osy keńistikti adamdardyń kúndelikti tájirıbesi men qajettilikteri turǵysynan qarastyratyn uzaq merzimdi paıymmen tolyqtyra alady. Qalanyń dızaın-kodyn ázirleý jáne brendıng baǵytyn zerdeleý de bolashaqtaǵy yqtımal jumystyń qatarynda, — delingen ákimdik habarlamasynda.
Alǵashqy zertteý bastamalarynyń biri — Turǵyndar qalashyǵy men Retro saıabaq aýmaqtarynda jańa keńistikti damytýǵa qatysty jobalaý aldyndaǵy keshendi taldaý júrgizý. Onyń aıasynda aýmaqtardyń qazirgi paıdalanylýy, jaıaý júrginshiler baǵyttary, kógaldandyrý men shaǵyn sáýlet nysandarynyń jaı-kúıi zerdelenedi.Qala bıligi Turǵyndar qalashaǵy aýmaǵyndaǵy 3 saıabaq pen keńistikterdi biriktiretin biregeı joba jasaýdy josparlap otyr. Jobany jýyqta ótken oblystyq máslıhattyń otyrysynda depýtattarǵa tanystyrdy. Atyraý qalasy sáýlet jáne qala qurylysy bóliminiń ókilderi qoldanystaǵy saıabaqtardy qosyp, jańǵyrtý úshin 7 mlrd teńge kerektigin aıtty. Alaıda sol kezde depýtattar bastamanyń qajettiligine kúmán keltirip, bıýdjet qarajatyn jumsaýdyń tıimdiligine qatysty birqatar másele kótergen edi.
Jobaǵa sáıkes, saıabaq ishindegi kópirdiń ornyna qysta muz aıdyny, al jazda rolledrom retinde paıdalanýǵa múmkindik beretin alań jasaýdy josparlanǵan. Sondaı-aq kafeler men terrasalary bar gastronomııalyq aımaq qurylyp, kólikke arnalǵan kópirdiń astyndaǵy skeıt alańy jańartylady. Joba avtorlary saý aǵashtardy meılinshe saqtap, qýraǵan jáne kári aǵashtardy sanıtarlyq talaptarǵa saı kesýdi nemese almastyrýdy kózdep otyr.
Ortalyq zertteý nátıjeleri boıynsha qalalyq jobalardy ázirleýge qatysty saraptamalyq usynystar beredi. Alaıda bul usynystardy qaraý men iske asyrýdyń naqty tetikteri qosymsha aıqyndalýy qajet.
— Turǵyndardy jumysqa tartý ýrbanıstıkadaǵy birlesip jobalaý tásiliniń mańyzdy bóligi bolady. Zertteý barysynda áleýmettanýshylar men ortalyq mamandary turǵyndarmen áńgimelesip, olardyń pikirleri men usynystaryn jınaıdy. Sonymen qatar ortalyq áleýmettik jelilerde óziniń paraqshasyn ashyp, onda jumysy, zertteýleri, josparlanyp jatqan jáne júzege asyrylyp jatqan jobalary týraly aqparat jarııalaýdy josparlap otyr, — dep tolyqtyrdy oblys ákimdigi.
2026–2027 jyldary ortalyqtyń jumysyn uıymdastyrý, komanda jasaqtaý, bastapqy derekter jınaý jáne zertteý basymdyqtaryn belgileý josparlanyp otyr. Naqty jobalar men kútiletin nátıjeler zertteýlerdiń qorytyndysy men bekitiletin jumys josparyna qaraı anyqtalady.
Búginde Atyraý qalasynyń bas jospary daıyndalyp jatyr. Onyń aıasynda oblys ortalyǵyn eki ákimshilik aýdanǵa bólý máselesin qarastyrǵan.
Sondaı-aq jańa bas josparda sý basý qaýpi bar aýmaqtarda, sanıtarlyq-qorǵanysh aımaqtarynda jáne ınjenerlik jelilerdiń qorǵaý beldeýlerinde ornalasqan nysandardy kezeń-kezeńimen memleket muqtajyna alyp, buzý kózdelgen.
Atyraý qalasy men aýyldyq okrýgter aýmaǵyndaǵy 26 zırattyń jer kólemi budan bylaı ulǵaıtylmaıdy. Bul sheshim oblys ortalyǵynyń bas josparyna engiziletin ózgerister aıasynda qabyldanbaq.
