Atyraýda Ulttyq ulannyń 127 sarbazy ant berdi

ATYRAÝ. KAZINFORM — Atyraýda Ulttyq ulannyń №5546 áskerı bóliminde 127 sarbaz Otanǵa adal bolýǵa ant berdi. Sarbazdar elimizdiń ár óńirinen shaqyrylǵan. 

Saltanatty is-sharada aldymen elimizdiń Ánurany oınalyp, memlekettik Tý kóterildi. Áskerı bólimniń komandıri, podpolkovnık Erlan Ipatov sarbazdarǵa Otandy qorǵaýdyń mańyzy týraly áńgimeledi.

Áskerı bólimniń ardagerler keńesiniń tóraǵasy Luqpan Ýtekovtiń aıtýynsha, bul áskerı bólim 1991 jylǵy 25 aqpanda qurylǵan. Sodan beri munda jastardyń birneshe býyny áskerı boryshyn ótegen.

«Ant berý — ásker qataryna shaqyrylǵan sarbazdar úshin eń mańyzdy kún. Óıtkeni bárimiz Otandy qorǵaýymyz qajet. Al áskerı bólim — jas jigitterdi tózimdilikke, qıyndyqty eńserýge shyńdaıtyn mektep. Sol sebepten sarbazdarǵa júkteletin jaýapkershilik zor. Ulttyq ulannyń qataryna shaqyrylǵan sarbazdar Otanymyz ben jerimyzdi qorǵaýǵa ant berdi. Jas ulandarymyz antyna adal bolyp, áskerı boryshyn abyroıly atqaratynyna senemin», - deıdi Luqpan Ýtekov.

Áskerı bólimniń komandıri, podpolkovnık Erlan Ipatovtyń aıtýyna qaraǵanda, sarbazdar Batys Qazaqstan, Aqtóbe, Jambyl, Shyǵys Qazaqstan, Soltústik Qazaqstan oblystary men Shymkent qalasynan shaqyrylǵan.

Eske sala ketelik, buǵan deıin Atyraýda áskerı bólimniń jas sarbazdary 30 shaqyrymdyq jaıaý joryqqa shyqqanyn jazǵan edik.