Atyraýda Ulttyq dombyra kúninde bir mezette 1000 oqýshy kúı tartady

ATYRAÝ. KAZINFORM – Atyraýda Ulttyq dombyra kúninde myń oqýshy kúı tartpaq. Atyraý oblystyq mádenıet jáne tilderdi damytý basqarmasynyń málimetinshe, 7 shilde kúni Isataı-Mahambet ortalyq alańynda «Shanaqtan sharyqtaǵan shartarapqa» atty mádenı is-shara ótedi. 

Keshki saǵat 20:30-da bastalatyn kontserttik baǵdarlamada 1 000 oqýshy dombyra shertedi. Aıta keteıik, ónerpazdardyń bári dombyra úıirmesine qatysady. 

Ortalyq alańda sondaı-aq kúı óneri sańlaqtarynyń esimi berilgen jergilikti eki orkestr óner kórsetedi. Onyń biri – kúıshi, kompozıtor, Qurmanǵazynyń shákirti Dına Nurpeıisovanyń atymen atalatyn akademııalyq qazaq halyq aspaptary orkestri. Al, ekinshisi – N.Jantórın atyndaǵy oblystyq fılarmonııanyń quramyndaǵy «Naryn» halyq aspaptary orkestri. Atalǵan óner ujymyna kúıshi, kompozıtor Qarshyǵa Ahmedııarovtyń esimi berilgen. 

Eske sala ketelik, budan buryn Atyraýda turatyn sheteldik bolashaǵyn dombyrasyz elestete almaıtynyn jazǵan edik.