Atyraýda soǵys ardageri Juma Medetovke arnalǵan memorıaldyq taqta ashyldy

ATYRAÝ. KAZINFORM – Atyraý qalasynda Ekinshi dúnıejúzilik soǵystyń jáne ishki ister organdarynyń ardageri, mılıtsııa polkovnıgi Juma Medetovke arnalǵan memorıaldyq taqtanyń saltanatty ashylýy ótti. Bul týraly Polisia.kz jazdy.

Іs-sharaǵa Atyraý oblysy polıtsııa departamenti bastyǵynyń orynbasary Erlan Bıǵambaev, ardagerdiń ul-qyzdary — Serik Jumıev pen Raýshan Medetova, Ardagerler keńesiniń tóraǵasy, Medetovter áýletiniń ókilderi jáne Qurmetti ardagerler qatysty.

Іs-shara barysynda qatysýshylar Juma Medetovtiń elge sińirgen eńbegin, soǵystaǵy erligin jáne ishki ister salasyndaǵy qyzmet jolyn eske alyp, batyr rýhyna taǵzym etti. Memorıaldyq taqtany ashý rásimin Erlan Bıǵambaev pen qurmetti qonaqtar birge júzege asyrdy.

Juma Medetovtiń ómir joly — Otanǵa adal qyzmet etýdiń, erlik pen eńbekqorlyqtyń aıqyn úlgisi. Ol 1920 jyldyń 1 sáýirinde Batys Qazaqstan oblysy Qaratóbe aýdanynyń Tólen aýylynda dúnıege kelgen. Uly Otan soǵysyna qatysyp, Ortalyq, Ýkraın jáne Belarýs maıdandarynda erlikpen shaıqasqan. Soǵystan keıin ishki ister organdarynda uzaq jyldar qyzmet etip, Gýrev oblystyq mılıtsııa basqarmasynda túrli basshylyq laýazymdardy atqarǵan. Ardagerdiń erligi men eńbegi joǵary baǵalanyp, ol «Otan soǵysy» ordenimen, «Erligi úshin», «Germanııany jeńgeni úshin», «Jaýyngerlik eńbegi úshin» medaldarymen jáne basqa da memlekettik marapattarmen nagradtalǵan. Memorıaldyq taqta ardagerdiń ózi turǵan úıdiń qabyrǵasyna — Atyraý qalasyndaǵy Satpaev dańǵylyna ornatyldy.

Elge eńbegi sińgen batyr tulǵalardyń esimi, olardyń erligi men ónegeli ómiri árdaıym ult jadynda saqtalyp, jas urpaqqa úlgi bolmaq.

Buǵan deıin «Qazaq soldatynyń» keıipkeri Qaıyrǵalı Smaǵulov turǵan úıge eskertkish taqta ornatylǵanyn jazǵan bolatynbyz.