Atyraýda turǵyndar 5 jyldan beri aýyz sý qysymynyń tómendigine shaǵymdanyp keledi
ATYRAÝ. KAZINFORM - Atyraý qalasyna qarasty Kóktem yqsham aýdanynyń turǵyndary jaz bastalmaı jatyp aýyz sý tapshylyǵyna shaǵymdanýda. Jergilikti turǵyndardyń aıtýynsha, bul másele sońǵy bes jyl qatarynan qaıtalanyp keledi.
Aqsaı, Aqjar, Juldyz sııaqty yqsham aýdandar bir joldyń boıynda ornalasqan. Kóktem de osy eldimekenderge sý berilip otyrǵan qubyrǵa qosylǵan. Alaıda tirshilik nári olarǵa qajetti qysymda kelmeıtin kórinedi. Saldarynan kıim jýmaq túgili, kúndelikti jýynyp-shaıyný muń bolyp barady.
– Senbi-jeksenbide sý kóbine bolmaıdy deýge bolady. Tańerteń 1-2 saǵat qana álsiz aǵyp turady, qalǵan ýaqytta tamshylap nemese óte baıaý aǵady. Kórshiles Aqsaı yqsham aýdanynda sý qalypty berilip tur, al Kóktemde kóp úılerde sý múldem joq. Keıbir úılerde ǵana qysym bar, oǵan jeke sý sorǵylarynyń ornatylýy sebep , – dedi Kóktem yqshamaýdanynyń turǵyny Aqtolqyn Mýkýsheva.
Turǵyndardyń aıtýynsha, keshki 19:00–23:00 aralyǵynda sý tek tamshylap qana aǵady, sondyqtan olar sý qoryn aldyn ala jınaýǵa májbúr. «Atyraý oblysy Sý Arnasy» KMK ókilderi bul jaǵdaı tek Kóktem yqshamaýdanynda ǵana emes, Aqsaı-1, Aqsaı-2, Aqjar, Erkinqala jáne Damby eldimekenderine de ortaq ekenin aıtady. Mekeme dırektorynyń orynbasary Ǵasyrjan Lekerovtiń sózinshe, sý qalalyq júıeden beriledi jáne sorǵy stantsııalary arqyly qysymmen jetkiziledi.
- Bul jaqqa sý qaladan keledi. Novostroıka men Atyraý–Inder tasjoly qıylysynda sorǵy stantsııasy bar. Sol arqyly byltyrǵy deńgeıdegi qysymmen sý berilip otyr, – dedi ol.
Mamandardyń pikirinshe, qysymdy kóterý úshin qubyr boıyna taǵy bir sorǵyny qoıýdyń qajettiligi joq. Keıbir turǵyndardyń aýyzsýdy baý-baqsha sýarýǵa paıdalanýy jáne jeke sý sorǵylaryn ornatýy júıedegi qysymǵa áser etýi múmkin.
Turǵyndar jazda úı aýlasyna baý-baqsha egip, az da bolsa ónim alǵysy keledi.Alaıda tirshilik nárin kúndelikti úı sharýasyna jetkize almaı otyr. Eldimekende jazǵy sý qubyry 2022 jyly tek bir kóshege ǵana júrgizilgen. Bıyl ákimdik 1 shaqyrym jazǵy jelini júrgizbek nıette. Sodan keıin bul jumysty toqtatpaq. Jalpy bul yqshamaýdanda 2800-den asa adam turady. 27 kóshe bar.
- Qazir eldimekenge káriz jelisin tartý úshin joba daıyndalyp jatyr. Sol aıaqtalǵannan keıin ǵana jazǵy sý qubyryn tartý josparlanýda. Qazirgi tańda bıýdjet qarajatyn bul baǵytqa jumsaý tıimsiz dep sanaımyz», – dedi Qaıyrshaqty aýyldyq okrýgi ákiminiń orynbasary Abaı Orynuly.
Mamandardyń aıtýynsha, qala irgesindegi eldimekenderdegi sý tapshylyǵy máselesin sheshý úshin táýligine 30 myń tekshe metr sý tazalaıtyn stantsııa salý josparda bar. Qazir jobasy memlekettik saraptamada. Joba quny shamamen 17 mlrd teńgeni quraıdy. Shildede saraptamadan oń qorytyndy alǵan jaǵdaıda, qarjy bólý máselesi qaralady. Degenmen qalalyq qurylys bóliminiń ókilderi jumystyń naqty qashan bastalyp, aıaqtalatynyn aıta almady.
Qazirgi tańda Atyraý qalasynda tórt sý stantsııasy jumys isteıdi.Qysta qala halqy kúnine 70 myń tekshe metr sý tutynsa, jazda bul kórsetkish 140 myń tekshe metrge jetedi.
Buǵan deıin Tarazda eki shaǵynaýdan turǵyndary kúzge deıin ystyq sýsyz qalǵanyn habarlaǵan edik.
