Atyraýda 45 jastaǵy áıel turǵyn úıdiń 8-qabatynan qulap, mert boldy

ATYRAÝ. KAZINFORM — Atyraý qalasynda 45 jastaǵy áıel kóppáterli turǵyn úıdiń 8-qabatynan qulap ketti. Ol oqıǵa ornynda kóz jumdy.

Atyraý oblysy polıtsııa departamentiniń baspasóz qyzmeti bul derekti rastady. Oqıǵa búgin, 9 qańtarda bolǵan. 

— Kúndizgi saǵat 11:00 shamasynda 1979 jylǵy áıel Atyraý qalasyndaǵy «Almagúl» shaǵyn aýdanyndaǵy kópqabatty úıdiń biriniń 8-qabatynan qulaǵan. Qazir áıeldiń ólimine qatysty QR Qylmystyq kodeksiniń 105-babymen qylmystyq is qozǵaldy. Oqıǵanyń mán-jaıy tekserilip jatyr. Atalǵan derek boıynsha keshendi tergeý amaldaryn júrgizý bastaldy, — dep habarlady departamenttiń baspasóz qyzmeti.

Áıeldiń turǵyn úıdiń joǵarǵy qabatynan qulaýyna ne túrtki bolǵany ázirge belgisiz. Oqıǵanyń sebebi tergeý kezinde anyqtalady.

Eske sala keteıik, buǵan deıin Atyraý oblysynda tóbelesten 1 adam mert bolyp, 2-eýi aýrýhanaǵa túskenin habarlaǵan bolatynbyz.