Atyraýda turǵyn úıde gaz jarylyp, 5 adamdy kúıik shaldy

Atyraýda turǵyn úıde gaz-aýa qospasy jarylyp, órtke ulasqan. Órtten 5 adamdy kúıik shalyp, bári aýrýhanaǵa jatqyzyldy, dep habarlaıdy Kazinform. 

Atyraý oblystyq Tótenshe jaǵdaılar departamentiniń qoǵammen baılanys tobynan málim etkendeı, órt 2 qańtarda bolǵan.

«Jergilikti ýaqytpen saǵat 11:10-da Call ortalyǵyna Atyraý qalasynyń Kókarna aýylynda turǵyn úıden tútin shyǵyp jatqany týraly qońyraý tústi. Órt sóndirý bólimsheleri shaqyrtý ornyna kelgen kezde gaz-aýa qospasynyń dúmpýi bolǵany anyqtaldy. Dúmpýdiń saldarynan turǵyn úıdiń 9 sharshy metr qabyrǵasy qulap, 140 sharshy metr alańy janyp ketti», - dep habarlady departamenttiń qoǵammen baılanys toby.

Turǵyn úıdegi órt saǵat 12:03-te oqshaýlandy. Saǵat 12:22-de jalyn tolyq sóndirildi.

«Órttiń saldarynan 5 adamdy kúıik shaldy. Zardap shekkender aýrýhanaǵa jatqyzyldy», - dep málim etti departamenttiń qoǵammen baılanys tobynan.

Jalyndy sóndirýge Atyraý oblystyq Tótenshe jaǵdaılar departamentinen 16 qyzmetker men 3 tehnıka tartyldy.

Eske sala ketelik, buǵan deıin Atyraýda jeke turǵyn úı órtenip, tútinge tunshyqqan 3 adam qutqarylǵanyn jazǵan bolatynbyz.