Atyraýda turǵyn úı jobasyna qatysty daý: menshik ıesi ákimdikti sotta jeńip shyqty

ATYRAÝ. KAZINFORM – Atyraý oblysynyń mamandandyrylǵan aýdanaralyq ákimshilik soty turǵyn úı salý jáne paıdalanýǵa qatysty daýǵa núkte qoıdy.

2020 jyly Atyraý qalasynyń turǵyny jalpy aýdany 45 sharshy metr turǵyn úı men 0,0679 gektar jer telimin jeke menshikke satyp alǵan. Jer teliminiń nysanaly maqsaty – turǵyn úı salý jáne paıdalaný bolǵan.

2023 jyly qaladaǵy Jer qatynastary, sáýlet jáne qala qurylysy bólimi menshik ıesine osy telimde jańa turǵyn úı salý úshin sáýlet-josparlaý tapsyrmasyn (SJT) bergen. 2024 jyly qurylystyń eskızdik jobasy kelisilip, nysan tolyq salynyp bitkennen keıin jańa úı men jer ýchaskesine menshik quqyǵy tirkelip, obektini paıdalanýǵa berý aktisi rásimdelgen.

- Alaıda sol jyldyń sońynda qala ákimdigi SJT sharttarynyń oryndalmaǵanyn alǵa tartyp, menshik ıesine buryn berilgen eskızdik jobany kelisýdiń kúshin joıý týraly habarlama jibergen. Buǵan kelispegen azamat sotqa júgingen.

Іsti qaraǵan Atyraý oblysynyń mamandandyrylǵan aýdanaralyq ákimshilik soty úı qurylysynyń memlekettik organdar bergen kelisimder men ruqsattar negizinde zańdy júrgizilgenin anyqtady. Sottyń uıǵarymynsha, eskızdik jobany kelisýdi joıý jónindegi áreketter talap qoıýshynyń óz menshigine bılik etý quqyǵyn shektep, Konstıtýtsııada kepildik berilgen menshikke qol suqpaý qaǵıdatyn buzady, - delingen aqparatta.

Nátıjesinde sot Jer qatynastary bóliminiń eskızdik jobany kelisýdiń kúshin joıý týraly buıryǵyn zańsyz dep tanyp, onyń kúshin joıdy.

Memlekettik organ bul sheshimge apellıatsııalyq shaǵym bergenimen, Atyraý oblystyq soty tómengi sottyń aktisin ózgerissiz qaldyrdy. Apellıatsııalyq alqa jobany qaıta kelisý týraly talaptardyń negizsiz ekenin atap ótti, sebebi mundaı sharttar bastapqy kelisý kezinde qoıylýy tıis.

Sonymen qatar qoldanystaǵy zańnamada buzýshylyqtar bolmaǵan jaǵdaıda buryn berilgen kelisimderdiń kúshin joıý qarastyrylmaǵan.

Sot sheshimi zańdy kúshine endi jáne oryndaldy.

Aıta keteıik, Atyraý oblysynda jer qatynastary bóliminiń basshysy ózine qol jumsady.