Atyraýda turaqtandyrý qorynyń ónimderin satatyn dúkender sany qysqaryp qalǵan
ATYRAÝ. KAZINFORM — Azyq-túlik baǵasy qymbattap jatqan tusta Atyraýda turaqtandyrý qorynyń ónimderi satylatyn birqatar dúken jabylyp qaldy. Qazir bul ónimder birneshe saýda núktesinde ǵana usynylyp otyr, al jergilikti bılik jańa dúkendermen kelissóz júrgizip jatyr.
Buǵan deıin turaqtandyrý qorynyń ónimderi birneshe jyl boıy «Lıder» jáne «Ideal» sýpermarketter jelisinde satylyp kelgen. Alaıda ótken jyldyń sońynda bul jelilerdiń núkteleri jabylyp, olardyń ornyna «Marco» dúkenderi ashyldy. Sol kezde qor ónimderi 14 dúkende satylǵan edi. Qazir onyń toǵyzy jumysyn toqtatyp, tek bes saýda núktesi ǵana qyzmet kórsetip tur. Bul dúkenderde turaqtandyrý qory arqyly 18 túrli áleýmettik mańyzy bar ónim usynylady.«Atyraý» áleýmettik-kásipkerlik korporatsııasynyń departament dırektory Qaısar Qurmanalıevtiń aıtýynsha, aldaǵy ýaqytta jańa saýda núkteleri iske qosylady.
— Qazirgi ýaqytta kelissózderdiń nátıjesinde «Klýbnıchnyı raı» sýpermarketimen kelisimge keldik. Kelesi aptadan bastap turaqtandyrý qory arqyly 11 túrli taýardy satý jumysy jandanady. «Marco» jelisiniń burynnan jumys istep turǵan 5 saýda núktesine «Klýbnıchnyı raıdyń» 4 núktesi qosylady. Budan bólek aýdandar boıynsha kelissózder júrgizilip jatyr, — dedi Qaısar Qurmanalıev.
Buǵan deıin turaqtandyrý qory arqyly satylatyn ónimderdiń sany 31-ge deıin kóbeıgen bolatyn. Degenmen áleýmettik-kásipkerlik korporatsııa ókilderi dúken ıelerin tizimdegi barlyq ónimdi satýǵa mindetteı almaıtynyn aıtady. Resmı málimetke sáıkes, turaqtandyrý qorynyń kókónisi «Marco» jelisimen qosa «Dına», «Saraıshyq» jáne «Kóktem» bazarlarynda, turǵyn úılerdiń mańyndaǵy 11 dúńgirshekte jáne «Klýbnıchnyı raı» jelisiniń 4 núktesinde satýǵa shyǵarylǵan.
Ótken jyly kásipkerlik korporatsııa kásipkerlermen maýsymaralyq kezeńge 9 871 tonna kókónisti tómendetilgen baǵamen jetkizý týraly kelisimshart jasaǵan. Qazir qoımalarda 2 myń tonnaǵa jýyq kókónis qory qalǵan.
Mamandardyń aıtýynsha, bul kólem sáýir aıynyń sońyna deıin jetkilikti. Al osy aıda kelesi maýsymǵa, ıaǵnı 2026 jyldyń qarashasy men 2027 jyldyń sáýiri aralyǵyna arnalǵan kartop, pııaz, sábiz jáne qyryqqabat qoryn qalyptastyrý jumystary bastalady.
— Qazir sharýashylyqtar naýryz aıynan bastap jer jyrtý jumystaryn júrgizedi. Odan keıin jerdi daıyndap, sáýir-mamyr aılarynda egistikke tuqym sebilip, sýarý jumystary bastalady, — dedi Qaısar Qurmanalıev.
Sonymen qatar óńirde sıyr eti qoryn qalyptastyrý úshin úsh aýyl sharýashylyǵy taýar óndirýshisimen kelisimshart jasalǵan. Alaıda olardyń ekeýimen kelisim merzimi bıyl naýryz aıynda aıaqtalǵan. Qazirgi tańda «Marco» saýda jelilerinde sıyr etiniń bir kelisi 3 500 teńgeden satylyp jatyr. Atyraý oblystyq aýyl sharýashylyǵy jáne jer qatynastary basqarmasy aımaqta et tapshylyǵy joq ekenin, qor arqyly satylatyn et kólemin eki ese kóbeıtý josparlanyp otyrǵanyn málimdedi.
— Jyldyq qajettilik boıynsha 258 tonna etti turaqtandyrý qoryna jetkizýge kelisimshart jasalǵan. Qazir 110 tonnaǵa kelisim bar. Oblys turǵyndarynyń qajettiligin tolyq qamtamasyz etý úshin tıisti qarajat bólinip, jumystar júrgizilip jatyr, — dedi basqarma basshysynyń orynbasary Azat Qapanov.
Aıta keteıik, 2026 jyly aınalym shemasy arqyly áleýmettik mańyzy bar ónimderdiń baǵasyn naryqtaǵydan 15–20 paıyzǵa tómen usyný jáne baǵanyń kúrt ósýiniń aldyn alý úshin 3 mlrd 300 mln teńge qarjy qarastyrylǵan.
Buǵan deıin Atyraý qalasyndaǵy saýda oryndarynda sıyr eti azaıyp ketkenin, bazarlar men iri dúkenderdiń et bólimderinde keıbir sóreler bos turǵanyn jazǵan edik.
