Atyraýda turaqtandyrý qoryna kókónis jetkizetin qojalyqtar sý tasqynynan zardap shekpegen

ATYRAÝ. KAZINFORM – Atyraý oblysynda turaqtandyrý qoryna kókónis jetkizetin sharýa qojalyqtar sý tasqynynan zardap shekpegen.

«Atyraý» áleýmettik kásipkerlik korporatsııasy» AQ azyq-túlik qaýipsizdigi departamentiniń dırektory Qaısar Qurmanalıevtiń aıtýynsha, turaqtandyrý qoryna úsh sharýa qojalyǵy kókónis jetkizedi. 

«Sý tasqyny kezinde «Agrofelıks», «Qyzanaq agro», «Otbasy» sharýa qojalyqtarynyń egistik alqaptary zardap shekken joq. Qazir atalǵan qojalyqtardyń egin alqaptarynda maýsymdyq jumystar jalǵasyp jatyr. Bul qojalyqtarmen maýsymaralyq kezeńge áleýmettik mańyzy bar kartop, pııaz, sábiz, qyryqqabat ónimderin ósirý, saqtaý jáne satý boıynsha kelisim jasalǵan bolatyn. Úsh sharýa qojalyǵy arqyly turaqtandyrý qoryna jetkiziletin aýyl sharýashylyǵy ónimderiniń kólemi 5667 tonnany quraıdy. Turaqtandyrý qory arqyly tutynýshylarǵa satylatyn kókónistiń baǵasy naryqtaǵy qunynan tómen bolady», - deıdi Qaısar Qurmanalıev.

Eske sala ketelik, buǵan deıin Qulsaryda áleýmettik mańyzy bar azyq-túlikterdiń baǵasy baqylaýǵa alynǵanyn habarlaǵan bolatynbyz.