Atyraýda túngi tynyshtyqty buzǵan 4 myńnan asa adam jaýapqa tartyldy
ATYRAÝ. KAZINFORM — Atyraý oblysynda bıyl túngi tynyshtyqty buzǵan 4,4 myńnan astam adamǵa ákimshilik hattama toltyryldy. Onyń 3 332-si Atyraý qalasynda tirkelgen.
Túngi tynyshtyqty buzýdyń negizgi sebepteriniń qatarynda kólikte mýzykany qatty qoıý, oıyn alańdaryndaǵy shamadan tys shý jáne kópqabatty úılerde tynyshtyq talaptaryn saqtamaý bar.
Atyraý oblysy Polıtsııa departamenti qoǵamdyq qaýipsizdik basqarmasynyń bastyǵy Ádilbek Qozybekovtiń aıtýynsha, qoldanystaǵy talaptarǵa sáıkes, jumys kúnderi saǵat 22:00–den 09:00–ge deıin, al demalys jáne mereke kúnderi 23:00–den 10:00–ge deıin tynyshtyq saqtalýy tıis.
— Túngi tynyshtyqty buzǵandarǵa bıyl 5 AEK, ıaǵnı 21 625 teńge mólsherinde aıyppul salynady. Quqyqbuzýshylyq bir jyl ishinde qaıtalansa, aıyppul kólemi 10 AEK-ke deıin ulǵaıady, — dedi Ádilbek Qozybekov.
Qoǵamdyq tártipti saqtaý jáne quqyqbuzýshylyqtyń aldyn alý maqsatynda polıtsııa qyzmetkerleri «Nóldik tózimdilik» qaǵıdaty boıynsha 17 profılaktıkalyq is-shara ótkizgen. Polıtsııa turǵyndardy belgilengen tynyshtyq talaptaryn saqtap, túngi ýaqytta aınaladaǵy adamdarǵa qolaısyzdyq keltirmeýge shaqyrdy.
Qazaqstanda jyl basynan beri polıtsııa tynyshtyqty buzýdyń 79 myń faktisiniń jolyn kesti. Bul ótken jyldyń sáıkes kezeńimen salystyrǵanda 13%-ǵa kóp.
