Atyraýda túnde aýadaǵy zııandy zattar 15 ese kóbeıgen
ATYRAÝ. KAZINFORM — Atyraýda aýa quramyndaǵy keıbir aromatty kómirsýtekterdiń mólsheri túngi ýaqytta ruqsat etilgen shekten 10-15 esege deıin artqany anyqtaldy. Oblystyq ekologııa departamenti sasyq ıis Atyraý munaı óńdeý zaýytynan dep otyr.
Sanıtarııalyq-epıdemıologııalyq baqylaý departamentiniń málimetinshe, 31 tamyz ben 5 qyrkúıek aralyǵynda Atyraý qalasynyń atmosferalyq aýasynan alynǵan synamalarda lastaýshy zattardyń ruqsat etilgen shekten asqany anyqtalmaǵan.
Alaıda 5 qyrkúıekten 6 qyrkúıekke jáne 6 qyrkúıekten 7 qyrkúıekke qaraǵan túnderi aýa quramyndaǵy keıbir aromatty kómirsýtekterdiń mólsheri qalypty deńgeıden birneshe ese joǵary bolǵan.
— Aldyńǵy aptada shamamen 608 synama alyndy. Sonyń 14-inen gıgıenalyq normatıvten asý faktisi anyqtaldy. Anyqtalǵan ıngredıentter — ızopropılbenzol, dımetılbenzol jáne kómirtek oksıdi, — dedi Atyraý oblysynyń sanıtarııalyq-epıdemıologııalyq baqylaý departamenti basshysynyń orynbasary Aıgúl I
Ysqaqova.
Mamannyń aıtýynsha, anyqtalǵan zattardyń adam densaýlyǵyna áserin baǵalaý kezinde olardyń tynys alý júıesine yqpal etýi múmkin. Atap aıtqanda, bul zattar bronhıaldy astma, jedel jáne sozylmaly bronhıt sııaqty aýrýlaryna sebep bolýy múmkin.
Óńirdiń bas ekology Asqar Júsipovtiń aıtýynsha, sońǵy zerthanalyq nátıjeler boıynsha túngi ýaqytta aromatty kómirsýtekterdiń shekti ruqsat etilgen kontsentratsııadan asý faktileri tirkelgen. Onyń sózinshe, atmosferalyq jaǵdaı da lastaýshy zattardyń taralýyna áser etken.
— 31 tamyzdan 7 qyrkúıekke deıin kúndiz jeldiń jyldamdyǵy 20-30 m/s bolsa, túngi ýaqytta onyń jyldamdyǵy 5-7 m/s-ke deıin tómendeıdi. Aýa temperatýrasynyń ózgerýi, jeldiń bolmaýy, ıaǵnı shtıl lastaýshy zattardyń eldimekenderge taralýyna áser etedi, — dedi Asqar Júsipov.
Ekologııa departamenti anyqtalǵan asyp ketý derekterin Atyraý munaı óńdeý zaýytymen baılanystyryp otyr. Sondyqtan kásipoprynǵa keshendi tekserý júrgizbek. Tekserýge táýelsiz sarapshylardy tartý josparlanyp otyr. Departamenttiń málimetinshe, mundaı tekseristi bastaýǵa keminde 10 kún qajet.
Al Atyraý munaı óńdeý zaýyty kásiporynnyń osy kúnderi shtattyq rejımde jumys istegenin jáne apat bolmaǵanyn málimdedi. Qazir mamandar aýadaǵy anyqtalǵan shyǵaryndylardyń zaýyt qyzmetine qatysy bar-joǵyn tekserip jatyr.
— Sanıtarııalyq-epıdemıologııalyq qyzmet pen ekologııa departamenti Hımposelok eldimekeninde aromatty kómirsýtekter boıynsha shekti mólsherden asý faktilerin anyqtady. Qazirgi ýaqytta zaýyt qyzmetteri bul shyǵaryndylar men onyń normadan asyp ketý derekteriniń Atyraý munaı óńdeý zaýytyna qatysy bar-joǵyn anyqtap jatyr, — dedi «AMÓZ» JShS Eńbekti, qorshaǵan ortany qorǵaý jáne azamattyq qorǵanys departamentiniń dırektory Arman Dımýkashev.
Jaǵdaı oblys ákimdiginiń qatysýymen ótken jıyndarda da talqylandy. Keıingi kúnderi óńir basshysy jaýapty memlekettik organdar men kásiporyndardyń basshylaryn birneshe ret jınaǵan.
Oblys bıligi ekologııalyq buzýshylyqtar men tabıǵatty qorǵaý baǵytyndaǵy derekterdi bir bazaǵa jınaqtap, olardy ózara ıntegratsııalaýdy josparlap otyr.
Aıta keteıik, Atyraýda aýa sapasyna qatysty uqsas jaǵdaı qańtar aıynyń sońynda da tirkelgen. Sol kezde júrgizilgen zertteý nátıjeleri boıynsha ekologııalyq talaptardy buzǵany úshin Atyraý munaı óńdeý zaýytyna 520 mln teńge kóleminde aıyppul salynǵan. Kásiporyn bul sheshimmen kelispeı, aıyppulǵa qatysty sotqa júgingen. Qazirgi ýaqytta is sotta qaralyp jatyr.
Sanıtarııalyq-epıdemıologııalyq baqylaý departamentiniń málimetinshe, jyl basynan beri Atyraýda aýa quramyndaǵy lastaýshy zattardyń shekti mólsherden asýynyń 69 deregi tirkelgen.
