Atyraýda tún ortasynda moped qaqqan 28 jastaǵy áıel aýrýhanada kóz jumdy

ATYRAÝ. KAZINFORM – Atyraý qalasynda moped júrgizýshisi tún ortasynda 28 jastaǵy áıeldi qaǵyp ketti. Jol-kólik oqıǵasynan zardap shekken áıel oblystyq aýrýhanada kóz jumdy.

Bul derekti Atyraý oblystyq Polıtsııa departamenti baspasóz qyzmeti rastady. Jol-kólik oqıǵasy 11 qyrkúıekte túngi ýaqytta bolǵan.

«Atyraý qalalyq Polıtsııa basqarmasyna 11 qyrkúıek kúni saǵat 23:00 shamasynda moped júrgizýshisiniń jaıaý júrginshini qaǵyp ketkeni týraly habar tústi. Jol-kólik oqıǵasy shahardaǵy Sh.Ýálıhanov-G.Kantsev kósheleriniń qıylysynda bolǵany anyqtaldy. Mopedtiń rýlinde 21 jastaǵy júrgizýshi bolǵan. Áıel atalǵan kóshelerdiń qıylysynda joldyń jaıaý júrginshige arnalmaǵan tusynan ótip bara jatqan. Sol kezde ony moped qaqqan», - dep habarlady departamenttiń baspasóz qyzmeti.

Jol-kólik oqıǵasynan túrli jaraqat alǵan áıel jedel járdem brıgadasynyń kóligimen Atyraý oblystyq aýrýhanaǵa jetkizilgen. Alaıda zardap shekken 28 jastaǵy áıel alǵan jaraqatynyń saldarynan olystyq aýrýhanada qaıtys bolǵan.

«Qazir jol-kólik oqıǵasyna baılanysty tıisti is qujattary jınaqtalyp jatyr. Oblys turǵyndary men júrgizýshilerine jol erejesin qatań saqtaýdy eskertemiz», - dep málim etti departamenttiń baspasóz qyzmetinen.

Eske sala ketelik, buǵan deıin Atyraý oblysynda jyl basynan beri jol apatynan 5 jasóspirim kóz jumǵanyn jazǵan bolatynbyz.