Atyraýda týdy qorlaǵandardyń artynda turǵandardy jazalaý kerek — Bapı

ASTANA. KAZINFORM — Májilis depýtat Ermurat Bapı Bas prokýror Berik Asylovtyń atyna Atyraýda arabsha jazýy bar Qazaqstan týymen sýretke túsken azamattardy arandatqandardy jazaǵa tartýdy surap, saýal joldady.

— Jýyrda ǵana Atyraýda bolǵan oǵash oqıǵa qoǵamda úlken rezonans týǵyzyp, azamattardyń ashý-yzasyn týdyryp otyr. Bet-aýzyn tumshalap, qara jamylǵan tórt áıel muz aıdynynda ótken jarys kezinde Memlekettik týdy ustap túsken sýret áleýmettik jelilerge keńinen tarap ketti. Olardyń qolyndaǵy memlekettik týdyń betine arab jazýy men arabı qylyshtyń sulba-sýreti salynǵan. Munda bizdiń nazarymyzdy aýdarǵan — kók týdaǵy arab qarpindegi jazýdyń óte sapaly túrde, arnaıy baspa quralymen tańbalanýy. Demek, bul — jaı ǵana turmystyq buzaqylyq, ádepsiz shekten shyǵýshylyq qana emes. Bul — bizdiń qoǵamymyzǵa, memlekettigimizge, ulttyq dástúrimiz ben biregeıligimizge jasalǵan ashyq jáne naqaq qarsylyq, — deıdi depýtat.

Onyń paıymdaýynsha, Memlekettik týdy qorlaý — búkil halyqty, tutas memleketti qorlaý.

— Eldiń týyn búldirý arqyly jat pıǵyldy dáriptemek bolǵan bul tórt qyz áldebir arandatýshy toptyń qurbany bolýy múmkin. Olar jastyq alańǵasarlyqpen, álde materıaldyq qyzyǵýshylyqpen nemese dinı saýatsyzdyqpen jasaǵan bul óreskel zań buzýshylyqtyń tasasynda turǵan áldebir kereǵar kúshter bar sııaqty. Mine, ákimshilik turǵydaǵy jazasyn alǵan tórt qyzdan buryn, osy qylmysty áreketti uıymdastyrýshylar jazaǵa tartylýy tıis, — dedi Ermurat Bapı.

Sondaı-aq, ol mundaı standartqa saı emes tý Wildberries Russ marketpleısinde 5000 myń teńgeden satylyp jatqanyn aıtty. 

Ermurat Bapı quqyq qorǵaý organdaryn osy oqıǵany jiti tekserip, arandatýshylyqqa aldanǵan tórt áıeldiń artynda turǵan kúshterdi, jalǵan týdy daıyndaýshylardy, ony taratýshylardy anyqtap, mundaı qastandyqtyń jolyn kesý úshin, uıymdastyrýshylarǵa qatań jaza qoldanýǵa shaqyrdy.

— Bekitilgen standartqa sáıkes kelmeıtin, resmı sıpaty burmalanǵan memlekettik rámizdi satýǵa shyǵarǵan saýda oryndarynyń basshylyǵyn jaýapqa tartý kerek. Satylyp ketken týlardy jınap alyp, joıý qajet, — dedi depýtat.

Buǵan deıin memlekettik týdy qorlaǵan atyraýlyqtyń biri 15 táýlikke qamaýǵa alynǵanyn jazǵan edik. 

Keıin memlekettik Týdy qorlaǵan taǵy bir jasóspirimniń isi qaraldy.