Atyraýda toı kortejinde jol erejesin buzǵan 8 júrgizýshi jaýapqa tartyldy
ASTANA. KAZINFORM — Atyraýda toı kortejine qatysýshylardyń jol qozǵalysy erejelerin óreskel buzǵany anyqtalyp, 8 azamat ákimshilik jaýapkershilikke tartyldy, dep habarlaıdy Polisia.kz.
Patrýldik polıtsııa qyzmetkerleri jol qozǵalysy qaýipsizdigin qamtamasyz etý baǵytyndaǵy jumysty kún saıyn kúsheıtilgen rejımde júrgizip otyr. Qoǵamdyq tártip pen jol qaýipsizdigine qaýip tóndiretin quqyq buzýshylyqtar áleýmettik jelilerge júrgiziletin turaqty monıtorıng barysynda da anyqtalady.
— 2 tamyzda áleýmettik jelilerdi monıtorıngteý kezinde 1 tamyz kúni saǵat 20:00 shamasynda Atyraý qalasyndaǵy Ábilqaıyrhan dańǵyly boıynda toı kortejine qatysqan Volkswagen Polo jáne Lada Priora avtokólikteriniń júrgizýshileri men jolaýshylarynyń jol qozǵalysy qaýipsizdigine qaýip tóndiretin áreketterge barǵany anyqtaldy. Patrýldik polıtsııa qyzmetkerleriniń jedel-izdestirý jáne tekserý sharalarynyń nátıjesinde quqyq buzýshylyqqa qatysy bar 8 azamattyń jeke basy anyqtaldy, — delingen aqparatta.
Olarǵa manevr jasaý qaǵıdalaryn buzý, qaýipsizdik beldigin taqpaý, avarııalyq jaǵdaı týǵyzý jáne kólik quraldaryn paıdalaný talaptaryn saqtamaý faktileri boıynsha ákimshilik hattamalar toltyrylyp, zańnamaǵa sáıkes tıisti sharalar qabyldandy.
— Polıtsııa jol qozǵalysy erejelerin óreskel buzý ózge de jol qozǵalysyna qatysýshylardyń ómiri men densaýlyǵyna tikeleı qaýip tóndiretinin eskertedi. Joldaǵy tártip — barshaǵa ortaq jaýapkershilik. Polıtsııa qaýipsizdik talaptaryn buzǵan azamattarǵa qatysty zańda kózdelgen sharalar qabyldanatynyn eske salady, — delingen aqparatta.
Buǵan deıin Abaı oblysynda polıtsııa 8 ret ereje buzǵan kortej júrgizýshilerin ustady.
Sondaı-aq Túrkistan oblysynda jol erejesin buzǵan toı kortejiniń júrgizýshileri jazalandy.
