Atyraýda tórt úıdiń qasbetin qaptaý jumysy birinshi qabattan aspaı qaldy
ATYRAÝ.KAZINFORM – Atyraý qalasynyń ortalyǵyndaǵy tórt kópqabatty turǵyn úıdi jóndeý jumysy qarjylandyrý máselesine baılanysty toqtap tur. Quny 437 mln teńge bolatyn jobanyń ázirge 60%-y oryndalǵan.
Abaı kóshesindegi №11, 14A, 16A jáne 18A úılerdiń qasbeti men shatyryn jóndeý jumysy osy jyldyń sáýirinde bastalǵan. Joba aıasynda shatyrdy aýystyrý, ǵımarattardyń syrtqy qabatyn jańartý, sondaı-aq kireberisterdegi esik-terezelerdi aýystyrý kózdelgen.
Bul jumysqa úsh merdiger uıym jaýapty. Qala ákimdiginiń málimetinshe, jobanyń jalpy quny 437 mln teńge. Qazirgi ýaqytta onyń 317 mln teńgesi ıgerilgen. Alaıda qarjylandyrýǵa qatysty máselelerge baılanysty qurylys-montaj jumysy ýaqytsha toqtap tur. Bastapqy jospar boıynsha tórt úı qyrkúıektiń sońyna deıin jóndelýi tıis edi. Alaıda olardyń syrtyn arnaıy taspen qaptaý jumysy birinshi qabattan aspady.
— Jumystardy tolyq aıaqtaý úshin qarjylandyrý máselesi jyl aıaǵyna deıin sheshiledi dep josparlanyp otyr, — dep habarlady qala ákimdigi.
Aıta keteıik, Atyraýda kópqabatty turǵyn úılerdiń qasbeti men shatyryn jańartý jumysy buǵan deıin de júrgizilgen. 2024–2025 jyly Neverov kóshesindegi úsh jáne Q.Sátbaev kóshesindegi alty turǵyn úı jóndeldi. Toǵyz úıdi jańartýǵa jalpy 1,2 mlrd teńge jumsalǵan.
Aldaǵy jyldary taǵy 13 turǵyn úıdi kúrdeli jóndeý josparlanyp otyr. Qazir jobalaý-smetalyq qujattama ázirlenip jatyr. Memlekettik saraptamanyń oń qorytyndysy alynǵannan keıin, qurylys-montaj jumysyn 2027–2029 jyldary júrgizý kózdelgen.
Eske salaıyq, Atyraýda kópqabatty 45 úıdi jóndeýge jáne 67 lıftini aýystyrýǵa 3,7 mlrd teńge qajet ekenin jazǵan edik. Ázirge bul qarjy qazynadan qaralmaı otyr.
