Atyraýda topyraq aralas jańbyr saldarynan 27 myńǵa jýyq tutynýshy jaryqsyz qaldy
ATYRAÝ. KAZINFORM – Atyraý qalasynda bir keshte 27 myńǵa jýyq tutynýshy jaryqsyz qaldy. Bul týraly «Atyraý Jaryq» JShS ókilderi málim etti.
Keshe qalada bolǵan apat saldarynan 3300 zańdy tulǵa men 23 myńnan astam jeke abonent elektr energııasynan ýaqytsha ajyratylǵan. Jaryq birneshe saǵattan keıin qaıta qosylǵanymen, turǵyndardyń narazylyǵy kúsheıdi.
Energetıka salasynyń mamandary apattyq óshýdi birneshe kún buryn jaýǵan topyraq aralas jańbyrmen baılanystyryp otyr. Olardyń aıtýynsha, jaýyn-shashyn kezinde elektr jelilerindegi ızolıatorlarǵa jınalǵan shań men topyraq ylǵalmen qosylyp, toqtyń jerge ótýine sebep bolǵan.
- Elektr qondyrǵylarynda arnaıy ızolıatsııa bar. Biraq syrtta turǵan ızolıatorlarǵa shań, topyraq jınalsa, jańbyr kezinde ol ylǵalmen aralasyp, jelige aqaý túsiredi. Sonyń saldarynan bir áýe jelisindegi 30-40 transformator birden sónýi múmkin, – dedi «Atyraý Jaryq» JShS bas ınjeneri Qýat Sısenǵalıev.
Óńirde 10 myń volttan 220-380 voltqa deıin qýat beretin 5600-den astam transformator bar. Onyń 1600-i «Atyraý Jaryq» mekemesiniń, 800-i qalalyq turǵyn úı-kommýnaldyq sharýashylyǵy jáne turǵyn úı ınspektsııasy bóliminiń balansynda. Qalǵany jekemenshik nysandarǵa tıesili. Apattyq jaǵdaıdy joıýǵa «Atyraý Jaryqtyń» 8 brıgadasy jumyldyrylǵan.
Qala ákimdigi jyl saıyn jelilerdi kútip ustaýǵa jáne apatty jaǵdaılardy qalpyna keltirýge shamamen 350 mln teńge bóledi. Soǵan qaramastan, turǵyndar elektrmen qamtý sapasyna kóńili tolmaıtynyn aıtady. Óıtkeni jel kúsheıip, jańbyr jaýsa, jaryqtyń óshýi jıilep ketedi.
Atyraý qalalyq TÚKSh jáne turǵyn úı ınspektsııasy bóliminiń málimetinshe, qazirgi ýaqytta jelilerdi jańǵyrtý jumystary kezeń-kezeńimen júrgizilip jatyr. Bıyl 162 shaqyrym jelini jańartý jobasy daıyndalǵan.
- Eski jelilerdiń bir bóligi «Atyraý Jaryq» teńgeriminde. Óz tarapymyzdan zamanaýı kabelderge aýystyrý jumystaryn júrgizip jatyrmyz. Aldaǵy ýaqytta bul baǵyttaǵy jumystar jalǵasady, – dedi bólimniń bas mamany Aman Latıpov.
Bıyl «Atyraý Jaryq» kúrdeli jóndeý jumystaryna 1 mlrd 200 mln teńge bólgen. Bul qarajatqa 717 shaqyrym elektr jelisi, 6 qosalqy stantsııa jáne 60 transformator jóndelmek. Sonymen qatar, ınvestıtsııalyq baǵdarlama aıasynda 8 transformatorlyq pýnktti tolyq jańǵyrtý josparlanyp otyr. Oǵan 2 mlrd teńgeden astam qarjy qarastyrylǵan.
QR Energetıka mınıstrligine qarasty Memlekettik energetıkalyq qadaǵalaý jáne baqylaý komıtetiniń aýmaqtyq departamentiniń dereginshe, ótken jyldyń qorytyndysy boıynsha «Atyraý Jaryq» jelileriniń tozý deńgeıi 67 paıyzǵa jetken. Keshegi apattan keıin aýmaqtyq departament mekemege tekseris júrgizýdi josparlap otyr.
30 naýryz keshkilik ýaqytta Atyraý qalasynda 9300-den asa úı jaryqsyz qaldy.
