Atyraýda ІІ top múgedegi tis emhanasynyń sapasyz qyzmeti úshin sotqa júgindi

ATYRAÝ. KAZINFORM – Atyraýda ІІ top múgedegi sotqa júginip, tis emhanasynyń sapasyz qyzmet kórsetkenin dáleldedi. Endi oǵan moraldyq shyǵyn óteledi.

Atyraý oblystyq sotynyń baspasóz qyzmetinen málim etkendeı, ekinshi top múgedegi A. qalalyq sotqa tis emhanasynan 1 mln teńge moraldyq zııan ótemaqysyn óndirý týraly talappen júgingen. 

Talap qoıýshynyń aıtýynsha, buǵan dárigerdiń onyń tisin sapasyz emdegeni sebep bolǵan. Em júrgizilgennen keıin tisiniń aýyrǵany basylmaı, tis emhanasynyń dárigerine qaıtadan barǵan. Alaıda, dáriger aýyrǵan tisti qaramaı, isip ketken jaǵdaıda ǵana kelý keregin aıtyp, keri qaıtaryp jibergen. 

«Emdelýshi tisiniń isýine baılanysty sol dárigerge taǵy da júgingen. Bul joly dáriger ekinshi top múgedegine oblystyq aýrýhanadan em alý úshin joldama jazyp bergen. Oblystyq aýrýhanada emdelýshige tisiniń irińdeýine baılanysty ota jasalǵan. Ol atalǵan aýrýhanada uzaq ýaqyt em alǵan», - dep habarlady sottyń baspasóz qyzmeti. 

Atyraý qalalyq sotynda qaralǵan azamattyq is sońy taraptardyń daýdy medıatsııa tártibimen retteýine ulasty. Taraptar ózara kelisimge kelgen.

«Kelisim sharttyna sáıkes tis emhanasy talap qoıýshyǵa moraldyq zııan úshin 100 myń teńge ótemaqyny, dári-dármek shyǵyndaryn tóleýdi mindetine aldy. Al, talap qoıýshy óziniń talabynan bas tartty. Sot uıǵarymymen atalǵan medıatsııalyq kelisim bekitildi», - dep málim etti sottyń baspasóz qyzmetinen. 

Sot aktisi zańdy kúshine endi.

Eske sala ketelik, buǵan deıin Atyraý oblysynda quqyǵy buzylǵan tutynýshylarǵa 14 mln teńge qaıtarylǵanyn habarlaǵan edik.