Atyraýda tikeleı efırde «terrorıstpin» degen eki áıelge qatysty is qozǵaldy
ATYRAÝ. KAZINFORM — Áleýmettik jelide tikeleı efırge shyǵyp, «Men jıyrma jyldan beri terrorıstpin. KNB tanıdy meni» degen eki áıeldiń áreketine qatysty polıtsııa ákimshilik ister qozǵady.
38 jáne 39 jastaǵy eki áıel Atyraýdaǵy saýda oryndarynyń birinde otyryp, áleýmettik jeli arqyly tikeleı efırge kirgen. Keıin biri ózin terrorıstpin dep tanystyryp, ulttyq qaýipsizdik komıtetiniń qyzmetkerleri ony jaqsy tanıtynyn aıtty.
Atyraý oblystyq polıtsııa departamenti bul vıdeodan keıin eki áıelge qatysty usaq buzaqylyq, quqyqqa qaıshy kontent taratý, sondaı-aq qoǵamdyq oryndarda adamnyń jeke basyn anyqtaýǵa kedergi keltiretin kıim kııý derekteri boıynsha úsh ákimshilik is qozǵady. Іs materıaldary sotqa joldandy.
Sonymen qatar áıeldermen teolog sóılesip, proflıaktıkalyq is-shara júrgizgen.
— Kezdesý barysynda olarǵa zań talaptary, qoǵamdyq tártip normalary jáne osyndaı quqyq buzýshylyqtarǵa jol bermeý qajettigi túsindirildi. Áleýmettik jeliler — zań talaptary qoldanylmaıtyn orta emes. Tikeleı efır kezinde de jasalǵan kez kelgen quqyqqa qaıshy áreketke zań aıasynda tıisti baǵa berilip, kináli tulǵalar qoldanystaǵy zańnamaǵa sáıkes jaýapkershilikke tartylady, — dep málimdedi Atyraý oblystyq PD baspasóz qyzmeti.
Buǵan deıin Atyraýda kámeletke tolmaǵan qyzynyń áleýmettik jelidegi áreketi úshin anasy ákimshilik jaýapkershilikke tartylǵanyn jazǵan edik.
