Atyraýda tyshqan qaptap, tóbesinen sý ketken mekteptiń jóndeýi taǵy da keıinge qaldy
ATYRAÝ. KAZINFORM — Atyraý oblysynyń Mahambet aýdanyndaǵy Taldykól aýylynyń turǵyndary orta mektep ǵımaratynyń tehnıkalyq jáne sanıtarlyq jaǵdaıyna alańdaýly. Ata-analardyń aıtýynsha, bilim ordasynda tóbeden sý aǵyp, qabyrǵalary jarylǵan, al kúrdeli jóndeý jumysy áli bastalmaǵan.
Taldykól aýylyndaǵy orta mektepke sońǵy 16 jylda kúrdeli jóndeý júrgizilmegen. Ata-analardyń aıtýynsha, ǵımarattyń qabyrǵalary jarylyp, tóbesinen sý aǵady. Qys mezgilinde mekteptiń ishi sýyq bolyp, keıbir kabınetter men sport zaldy paıdalaný qıynǵa soǵady.
Aýyl turǵyny Jumagúl Sultanovanyń sózinshe, mektepte júrgizilip jatqan aǵymdaǵy jóndeý jumysy máseleni tolyq sheshpeıdi.
— Mekteptiń tóbesinen jańbyr jaýsa, qar erise sý aǵady. Sport zal qysta jumys istemeıdi, ashana da sýyq. Buǵan deıin mektepte tyshqandar kóbeıip, olardyń ıisi áli kúnge deıin seziledi, — deıdi ol.
Ata-analardyń bir toby mekteptiń sanıtarlyq jaǵdaıyna alańdaýshylyq bildirdi.
— Balalar sport zaldyń sýyq ekenin aıtyp keledi. Keıde jańbyr kezinde sý tamshylaıdy deıdi. Mekteptiń ishinde jaǵymsyz ıis bar. Jertóledegi jaǵdaı da kóńil kónshitpeıdi, — deıdi aýyl turǵyny.
Eki jyl buryn aýylǵa kelgen sý áleýmettik mańyzy bar nysandarǵa qaýip tóndirgen bolatyn. Byltyr aýyl ishinde tyshqandardyń jappaı kóbeıýine baılanysty oqý protsesi eki aı onlaın formatta uıymdastyrylday. Kemirgishterdi ýlaǵannan keıin eden astynda qalǵan ólekselerdi tolyq tazartý múmkin bolmaı, ǵımarat ishinde jaǵymsyz ıis saqtalǵan. Aýyl turǵyndarynyń aıtýynsha, mektep aýmaǵynda jylandardyń da jıi kórinedi.
Mahambet aýdandyq bilim bóliminiń basshysy Venera Qabyshevanyń aıtýynsha, mektepti 2026 jyly renovatsııalaý josparlanǵan.
— Demeýshilerdiń qoldaýymen jobalyq-smetalyq qujattama ázirlenip, memlekettik saraptamanyń oń qorytyndysy alyndy. Kúrdeli jóndeýge 811,8 mln teńge kóleminde qarjy qarastyryldy. Onyń 80 paıyzy, ıaǵnı 649,4 mln teńge aýdan bıýdjetine bólindi. Alaıda memlekettik satyp alý rásimderin bastaýǵa ruqsat berilmedi, — dedi bólim basshysy.
Oblystyq bilim basqarmasy jóndeý jumystarynyń keshigýin bıýdjet qarajatynyń tapshylyǵymen túsindirip otyr.
— Taldyqól orta mektebinde 2026–2027 jańa oqý jylyna daıyndyq aıasynda aǵymdaǵy jóndeý jumysy júrgizilip jatyr. Jóndeý barysynda mektep ishi, oqý kabınetteri tolyqtaı retke keltiriledi. Bul oqý jyly bastalǵanǵa deıin tolyq aıaqtalady. Nátıjesinde mektepte bilim berý protsesin uıymdastyrýǵa eshqandaı kedergi týyndamaıdy. Oqýshylardyń qaýipsiz ári qolaıly ortada bilim alýyna múmkindik beredi, — dep málimdedi basqarma.
Basqarma málimetinshe, qarjy bólingen jaǵdaıda bilim ordasyna kúrdeli jóndeý júrgiziledi.
Al jańa oqý jyly qarsańynda mektep ǵımaratynyń sanıtarlyq jaǵdaıyna sanıtarııalyq-epıdemıologııalyq qyzmet mamandary baǵa beredi. Eger ǵımarat talapqa saı emes dep tanylsa, oqý protsesin uıymdastyrý máselesi qosymsha sheshilmek.
Eske salaıyq, jańa oqý jylynan bastap mektepterde úsh jańa mindetti kýrs engiziledi.
