Atyraýda tyshqan qaptap ketti
ATYRAÝ. KAZINFORM — Atyraý oblysynda arnaıy komıssııa qurylyp, zııankesterge qarsy kúres jumystary bastaldy. Mamandardyń málimetinshe, oblystyń keı aýmaǵynda tyshqan tuqymdas kemirgishterdiń sany kóbeıip ketken.
— Qazir oblys ákiminiń tóraǵalyǵymen arnaıy komıssııa quryldy. Komıssııa quramynda Atyraý qalalyq obaǵa qarsy kúres stantsııasy men SEQ ókilderi bar. Komıssııa sheshimine sáıkes, departamenttiń arnaıy mamandary aýyldyq okrýgterde deratızatsııa jumystaryn bastap, kemirgishterdiń kóbeıýiniń aldyn alý úshin eldi mekenderge ýly dári-dármek taratý sharalaryn bastady. Obaǵa qarsy kúres stantsııasynyń mamandary kúndelikti kemirgishterden arnaıy synamalardy alyp, zertteýler júrgizip jatyr. Ázirge eshqandaı ınfektsııalyq aýrý taraý máseleleri anyqtalmaǵan, — deıdi «Búgin LIVE» baǵdarlamasyna onlaın suhbat bergen Atyraý qalasy ákimi apparatynyń baspasóz hatshysy.
Ǵasyrbek Tólegenov oblys mamandary kemirgishterdiń kóbeımeýi úshin qandaı sharalardy júrgizip jatqanyn túsindirdi.
— Qazir Atyraý qalasynyń aýmaǵynda 2 baǵyttaǵy jumystardy júrgizip jatyrmyz. Birinshi baǵyt, eldi mekenderdegi árbir turǵyn úı jaılaryna ýly dánderdi berý. Ony arnaıy mamandar aparyp, qalaı qoldaný kerektigin túsindiredi. Kemirgishterdiń dalalyq aımaqqa ótip ketýiniń aldyn alý úshin jerdiń bárin arnaıy tehnıkalarmen jyrtyp, jyrtylǵan jerlerdiń bárine kemirgishterge qarsy preparattardy seýip jatyrmyz, — deıdi ol.
Al kemirgishterdiń kúrt kóbeıýine byltyr bolǵan sý tasqysy sebep bolýy múmkin.
— Kemirgishterdiń paıda bolýy birinshi kezekte kún raıynyń jyly bolýymen baılanysty. Qazir Atyraý oblysynda synap baǵanasy +9 gradýsty kórsetip tur. Odan keıin 2024 jyly bolǵan sý tasqyny sebep bolyp otyr dep oılaımyz, — deıdi Ǵasyrbek Tólegenov.
Eske sala keteıik, Atyraý oblysynda jyl basynan beri qaraýsyz mal kesirinen 33 jol-kólik oqıǵasy tirkelgen.