Atyraýda TikTok-ta balaǵat sóz aıtqan qyzdyń anasy jaýapkershilikke tartyldy
ATYRAÝ. KAZINFORM – Atyraýda kámeletke tolmaǵan qyzynyń áleýmettik jelidegi áreketi úshin anasy ákimshilik jaýapkershilikke tartyldy.
14 qazanda TikTok áleýmettik jelisindegi tikeleı efır kezinde kámeletke tolmaǵan qyz balaǵat sózder aıtqan.
Osy derekke baılanysty onyń zańdy ókiline kámeletke tolmaǵan balany tárbıeleý, oǵan bilim berý, quqyqtary men múddelerin qorǵaý jónindegi mindetterin oryndamaǵany úshin ákimshilik shara qoldanyldy.
Polıtsııa ata-analar men zańdy ókilder balalardyń tárbıesine jaýapty ekenin eske salady. Sondaı-aq olardyń minez-qulqyna, sonyń ishinde áleýmettik jelilerdegi áreketterine de nazar aýdarýy qajet ekenin eskertedi.
Quqyq qorǵaý organdary adamnyń ar-namysy men qadir-qasıetin qorlaýǵa, sondaı-aq býllıngke jol berilmeıtinin atap ótti.
Eske sala ketsek, buǵan deıin Taldyqorǵanda polıtsııa qyzmetkerleri áleýmettik jelige monıtorıng júrgizý barysynda TikTok platformasyndaǵy tikeleı efır kezinde aıtylǵan bylapyt sózderdi anyqtaǵanyn jazǵan edik.
