Atyraýda teńiz mańyndaǵy qamys órti 34 gektarǵa jaıyldy
ATYRAÝ.KAZINFORM — Atyraý qalasy mańyndaǵy batpaqty aýmaqta tutanǵan qamys órtiniń tútini shahardy basty. Qazirgi ýaqytta Kaspıı teńizi baǵytyna qaraı ornalasqan aýmaqtaǵy órt 34 gektardy sharpyǵan. Onyń 22 gektarynda janý toqtatylsa, qalǵan bóligindegi órtti sóndirý jumysy jalǵasyp jatyr.
Órt Atyraý qalasy Erkinqala aýyldyq okrýginen Kaspıı teńizi baǵytyna qaraı 40 shaqyrym qashyqtyqtaǵy batpaqty aýmaqta tirkelgen.
Atyraý oblystyq TJD málimetinshe, 20:00–degi jaǵdaı boıynsha janý aýmaǵy 34 gektar. Onyń 18 gektaryndaǵy qyzyl jalyndy qutqarýshylar sóndirse, 4 gektar aýmaqtaǵy órt ózdiginen toqtaǵan.
— Órt sóndirýshiler janýdy joıý baǵytynda jumys istep jatyr. Oqıǵa ornynda Atyraý oblysy TJD men «Aqjaıyq» memlekettik tabıǵı rezervatynyń 65 qyzmetkeri jáne 15 tehnıkasy jumyldyrylǵan, — delingen TJD habarlamasynda.
Qazirgi ýaqytta qamys órtiniń tútini Atyraý aspanyn tumshalady.
Osy jaǵdaı boıynsha óńir basshysy Serik Shápkenovtiń jınalys ótkizdi. Ákimdik aqparatynsha, órt «Aqjaıyq» memlekettik tabıǵı rezervatynan tys aýmaqta tutanǵan.
— Aımaq basshysy órtti sóndirý jumystaryn táýlik boıy júrgizýdi qamtamasyz etýdi, Isataı jáne Mahambet aýdandarynyń qosymsha kúshteri men quraldaryn jumyldyrýdy, «Aqjaıyq» rezervatynyń kúshin tartýdy jáne tótenshe jaǵdaımen kúreske jumylǵan qyzmetterdiń is-qımylyn úılestirýdi júktedi. Sondaı-aq oqıǵa ornynda jedel shtab jumysyn uıymdastyrýǵa tapsyrma berildi, — dep habarlady oblys ákimdiginiń baspasóz qyzmeti.
Buǵan deıin Shyǵys Qazaqstanda ormanǵa jaıylǵan iri órt sóndirilgenin jazǵan edik.
