Atyraýda teatrlandyrylǵan kórinister konkýrsynda Azǵyr polıgony máselesi kóterildi
ATYRAÝ. KAZINFORM — Oqýshylar arasynda ótken baıqaýda aımaqtaǵy ózekti máseleni qoıylym arqyly jetkizgen Qurmanǵazy aýdany Balqudyq jalpy orta mektebiniń oqýshylary baıqaýda I oryndy qanjyǵalap, 100 myń teńge syıaqyǵa ıe boldy, dep habarlaıdy Atyraý oblysy ákimdiginiń baspasóz qyzmeti.
Baıqaýǵa oblys boıynsha jalpy bilim beretin mektepterdiń 5–8 synyp oqýshylarynan quralǵan 11 komanda qatysty. Olar sahnada Qazaqstannyń ekologııalyq máselelerin, tabıǵatty aıalaý, tazalyqty saqtaý jáne qorshaǵan ortaǵa jaýapkershilikpen qaraý taqyryptaryn kórinis arqyly jetkizdi.
Konkýrstyń basty mindetteri — oqýshylardyń ekologııalyq sanasyn arttyrý, tabıǵatty qorǵaý mádenıetin nasıhattaý, shyǵarmashylyq qabiletterin shyńdaý.
— Bul konkýrs — balalardyń tabıǵatqa janashyrlyǵyn kórsetetin ıgi is-shara. Ol ekologııalyq mádenıetti qalyptastyrýǵa yqpal etedi. Elimizde «Taza Qazaqstan» tujyrymdamasy aıasynda túrli ekologııalyq jobalar júzege asyp jatyr. Tabıǵatty qorǵaý — keler urpaq aldyndaǵy boryshymyz. Barlyq qatysýshyǵa alǵys aıtyp, jeńimpazdardy quttyqtaımyn, — dedi oblystyq Tabıǵı resýrstar jáne tabıǵat paıdalanýdy retteý basqarmasynyń bólim basshysy Elmıra Sydyqova.
Ádilqazylar alqasy qoıylymdardy taqyryptyń ashylýy, akterlik sheberlik, kórkemdik bezendirilý jáne kórermenge áseri boıynsha baǵalady. Nátıjesinde ekinshi oryndy utqan Qyzylqoǵa aýdany Jańasharýa orta mektebiniń «Jas talant» teatry 80 myń teńge, úshinshi oryndy alǵan Qurmanǵazy aýdany Eńbekshi jalpy orta mektebiniń «Shyń» jasóspirimder teatrynyń oqýshylary 50 myń teńge syıaqyny ıelendi. Oqýshylardyń jetekshilerine dıplomdar jáne qalǵan komandalarǵa 15 myń teńge qarjylaı syılyq tabystaldy.
Aıta keteıik, konkýrsty Atyraý oblysy Tabıǵı resýrstar jáne tabıǵat paıdalanýdy retteý basqarmasy men «Arman asýy» qoǵamdyq qory uıymdastyrdy.