Atyraýda teatr qyzmetkerlerine arnalǵan jataqhana qurylysy bastalmaı jatyp keıinge qaldy
ATYRAÝ. KAZINFORM — Atyraýda teatr qyzmetkerlerine arnalǵan 60 oryndyq jataqhana qurylysy bastalmaı jatyp keıinge shegerildi. Jobasy daıyn bolǵanymen, bıyl nysandy bastaýǵa qajet 320,6 mln teńge bıýdjetten bólinbeı qalǵan.
Oblys ákimdiginiń alǵashqy jospary boıynsha bul jobanyń qurylysy bıyl kóktemde bastalýǵa tıis bolǵan. Nysannyń jobalyq-smetalyq qujattamasy ázirlenip, memlekettik saraptamanyń oń qorytyndysy alyndy.
Jobanyń jalpy quny 1 mlrd 69 mln teńgege jýyqtaıdy. Osy jyldyń mamyrynda oblystyq bıýdjetti naqtylaý barysynda qurylysty bastaý úshin 320 mln 693 myń teńgege bıýdjettik ótinish usynylǵan. Alaıda qarjy máselesi sheshilmegen.
— Qazir jobaǵa qarjy bólý máselesi sheshilgen joq. Osyǵan baılanysty qurylys-montaj jumysy bastalmady. Jobany iske asyrý merzimi tıisti qarjy bólingennen keıin aıqyndalady, — delingen Atyraý oblystyq qurylys, sáýlet jáne qala qurylysy basqarmasynyń jaýabynda.
Bes qabatty zamanaýı ǵımarat Mahambet atyndaǵy akademııalyq qazaq drama teatrynyń tozyǵy jetken, eski nysannyń ornyna salynady. Jataqhana tsokol jáne tehnıkalyq qabatty qamtıtyn qurylymdyq úlgide jobalanǵan. Astyńǵy qabatta ınjenerlik bólmeler ornalassa, birinshi qabatta sanıtarııalyq toraptar men múmkindigi shekteýli jandarǵa beıimdelgen aımaqtar qarastyrylǵan. Al joǵarǵy bólikterde eki adamǵa arnalǵan jáne otbasylyq turǵyn bólmeler, sondaı-aq ortaq as úı bolýy kerek.
— Jýyqta bıýdjet qyzmetkerlerine berilgen páterlerdiń kilti bizdiń de 16 qyzmetkerge buıyrdy. Jańa jataqhana jobasynyń júzege asýyn kútip otyrmyz. Aldaǵy ýaqytta bul joba tek teatr mamandaryna emes, óńirimizdiń mádenıet qyzmetkerlerine de úlken kómegi tıedi dep esepteımiz, — deıdi Mahambet atyndaǵy akademııalyq qazaq drama teatrynyń kórkemdik jetekshisi Temirbek Muhtarov.
Aıta keteıik, qazir aımaqta memlekettik saraptamadan ótken, jalpy quny 200 mlrd teńgeden asatyn taǵy birqatar joba qarjy men kezegin kútip otyr.
