Atyraýda tasqyn sýdyń ortasynan 80 jylqy qaýipsiz aýmaqqa shyǵaryldy

ATYRAÝ. KAZINFORM – Atyraýlyq qutqarýshylar tasqyn sýdyń ortasynan 80 jylqyny qaýipsiz aýmaqqa shyǵardy. 

Atyraý oblystyq tótenshe jaǵdaılar departamenti qoǵammen baılanys tobynyń málimetinshe, Qaıyrshaqty aýyldyq okrýginde tirkelgen sharýa qojalyǵynyń sharýashylyǵy tasqyn sýdyń ortasynda qalǵan.

«Osyǵan baılanysty qojalyq jetekshisi qutqarýshylardyń kómegine júgindi. Jedel qutqarý jasaǵynyń qutqarýshylary sý ortasynda qalǵan 4 úıirdegi 80 jylqyny qaýipsiz jerge aıdap shyǵardy», - dep habarlady departamenttiń qoǵammen baılanys toby.

Qutqarý jumystaryna 18 adam, 8 qaıyq, 4 tehnıka tartylǵan. Búgin qutqarý jumysy jalǵasady.

Eske sala ketelik, buǵan deıin Atyraý oblysynyń Mahambet aýdanynda 66 egin alqaby tasqyn sý astynda qalǵanyn jazǵan bolatynbyz.