Atyraýda tasqyn sý 100 metrge jýyq bógetti shaıyp ketti
ATYRAÝ. KAZINFORM – Atyraýda aǵysy qatty tasqyn sý 100 metr bógetti shaıyp ketti.
Atyraý oblysynyń jedel shtabynan málim etkendeı, shahar mańyndaǵy Aqjar aýylynda jaǵalaý bógetiniń 100 metr aýmaǵyn tasqyn sý shaıǵany anyqtalyp otyr.
Qazir bul aýmaqta nyǵaıtý jumystary júrip jatyr.
«Jaıyq ózeniniń jaǵasynda sý deńgeıin baqylap turǵan kezekshi quram tańǵy saǵat 04:00 shamasynda bógettiń bir bóligin sý shaıyp, qulap jatqanyn baıqaǵan. Biz tótenshe jaǵdaılar salasynyń mamandarymen birge bógetti jedel túrde nyǵaıtý jumysyna kirisip kettik. Qazirgi ýaqytta bul jerge geomembrana tóselip, qosymsha topyraq tógilip jatyr. Aǵysy kúsheıgen tasqyn sý shaıǵan bógettiń aýmaǵy 100 m. Jalpy sý shaıǵan bóget aýmaǵyn shıfer materıalymen qorǵaımyz degen josparymyz boldy. Alaıda, sý deńgeıiniń tereńdigi kedergi keltirdi», - deıdi atalǵan ýchastok úılestirýshisi Qaharman Rahmetuly.
Onyń aıtýynsha, jedel jumysqa Atyraý jáne Atyraý oblystyq tótenshe jaǵdaılar departamentterinen 20-ǵa jýyq maman tartyldy. Qazir qulaǵan bógetti qalpyna keltirý 90% aıaqtalǵan.
