Atyraýda jazyqsyz ajal qushqan ıtke qatysty oblys ákimi túsinik berdi
ASTANA. KAZINFORM – Atyraý oblysynda kóktemgi sý tasqyny kezinde qap tasyǵan ıt túsirilgen beınejazba jelide taraǵan edi. Belgili bolǵandaı birer kún buryn Pshon atty ıtti atyp tastaǵan. BAQ ókilderi janýarǵa jasalǵan qatygezdik týraly Atyraý oblysynyń ákimi Serik Shápkenovten túsinik berýin suraǵan edi.
- Bul jańalyqty BAQ-tan kórip, anyqtadym. Jaǵdaı 28 qarashada Mahambet aýdany, Sarytoǵaı aýylynda bolǵan. Aýyl turǵyny shaǵym túsiredi, sebebi úıine kire almaıdy, úıiniń qasynda buralqy ıtterdiń júrgenin aıtqan. Qazir bul fakti boıynsha qyzmettik taǵy basqa tekserý júrgizilip jatyr. Bizdiń óńirde zańǵa sáıkes buralqy ıtterdi uıyqtatyp, agressıvti jaǵdaıda joıylady nemese sterıldeý arqyly ıt ortaǵa qaıta jiberiledi, - dedi Serik Shápkenov OKQ-de ótken brıfıngide.
Sondaı-aq oblys basshysy Pshonnyń taǵdyryna qatysty tekserý jumysynyń qorytyndysy boıynsha qosymsha aqparat beriletinin aıtty.
Aıta keteıik, Kazinform tilshisi ıttiń ıesi Zámzagúl Jańabaevamen tildesip, mán-jaıdy anyqtaǵan edi. Onyń aıtýynsha, Pshondy ádeıi atqan.
Eske sala ketsek, kóktemgi sý tasqyny kezinde Atyraýda ıt te bóget salýǵa kómektesip júrgeni jaıly habarlaǵan edik.