Atyraýda tapshylyqqa baılanysty kórshi óńirlerden avtogaz jetkizilmek
ATYRAÝ.KAZINFORM — Atyraýda avtogaz tapshylyǵyna baılanysty janarmaı beketterinde uzyn-sonar kezek paıda boldy.
Kezek sońǵy birneshe kúnnen beri baıqalyp otyr. Júrgizýshiler suıytylǵan gazdy saǵattap kútýge májbúr bolǵan.
26 maýsymda Atyraý munaı óńdeý zaýytynda josparly aldyn alý jumysy bastalady. Tapshylyq máselesi osy jóndeýmen baılanysty.
Atyraý oblystyq energetıka jáne TÚKSh basqarmasynyń málimetinshe, osy aıǵa «AMÓZ» qorynan 2000 tonna gazy bólinip, sýbektilermen tasymaldanyp bastady. Budan bólek Aqtóbe oblysyndaǵy «SNPS-Aqtóbemunaıgaz» AQ-nan — 2 000 tonna, Oral qalasyndaǵy «Jaıyqmunaı» mekemesinen 740 tonna gaz jetkizilmek.
— Atalǵan kólemderdi resmı bólý jáne qujat berý jumystary júrgizilgen soń, logıstıkalyq kestege sáıkes vagondar jáne avtokólikter arqyly óńirge kezeń-kezeńimen jetkizilý merizimi shamamen 4-5 kún kóleminde ýaqytty talap etedi. Osy mezgilde qala jáne aýdandardaǵy jekelegen avtogaz quıý beketterindegi jaǵdaılardy eskere otyra, túsinistikpen qaraýlaryńyzdy suraıdy, — dep málimdedi basqarma.
Aıta keteıik, maýsym aıyna Energetıka mınıstrligi tarapynan óńirge 6 909 tonna suıytylǵan gaz bólinip, 25 maýsymdaǵy jaǵdaı boıynsha bul kólem tolyqtaı tasymaldanǵan. Al shildege 6882 tonna qarastyrylǵan.
Qazirgi ýaqytta Atyraýda suıytylǵan munaı gazyn bólý tártibine baılanysty daý týyndap, oblystyq energetıka jáne turǵyn úı kommýnaldyq sharýashylyq basqarmasyna qatysty tergep-tekserý júrip jatyr.
Jalpy Atyraý oblysyna aı saıyn 12-13 myń tonna avtogaz qajet.
