Atyraýda tanys qyzdy kólikke kúshtep mingizgen jigitke aıyppul salyndy

ATYRAÝ. KAZINFORM — Atyraýlyq jigit ózimen qurdas tanysyn kólikke kúshtep mingizgen. Sot qaýlysymen buzaqylyq jasaǵan jigitke aıyppul salyndy.

Atyraý qalalyq ákimshilik quqyq buzýshylyqtar jónindegi mamandandyrylǵan sotynda E.-ge qatysty ákimshilik is qaraldy. Kinálige QR Ákimshilik quqyq buzýshylyq týraly kodeksiniń 434-babynyń 1-bóligimen aıyp taǵylǵan. 

— E. 18 aqpanda óziniń tanysy K.-ny onyń kelisimimen óziniń avtókóligine otyrǵyzǵan. Jolda ekeýiniń arasynda janjal týyndaǵan. Sonyń nátıjesinde K. ári qaraı barýdan bas tartyp, kólikten shyǵyp ketken. ️Alaıda, E. buzaqylyq nıetpen, K.-nyń erkinen tys, qarsylyǵyna qaramastan, kúshpen ony kólikke qaıta otyrǵyzyp, usaq buzaqylyq jasaǵan, — dep habarlady atalǵan sottan.

Jábirlenýshi K. óz túsiniktemesinde E. ony úıine deıin jetkizgenin, oǵan eshqandaı talaby joq ekenin kórsetti.

Al E.-niń kinási óziniń moıyndaý jaýabymen, ákimshilik quqyq buzýshylyq týraly hattamamen, baıanatpen, saýal qoıý hattamasymen dáleldendi.

Sot qaýlysymen quqyq buzýshy E. aıyp taǵylǵan bappen kináli dep tanyldy. Quqyq buzýshyǵa 78 myń 640 teńge mólsherinde ákimshilik aıyppul salyndy.

Sot qaýlysy zańdy kúshine engen joq.

Eske sala ketelik, budan buryn Atyraýda 22 jastaǵy boıjetkendi kólikke kúshtep mingizgen jigit qamaýǵa alynǵanyn habarlaǵan edik.