Atyraýda taksı júrgizýshileriniń kesirinen 3 jylda 31 adam mert bolǵan

ATYRAÝ. KAZINFORM — Atyraý oblysynda sońǵy 3 jylda taksı júrgizýshileri 112 jol-kólik oqıǵasyna sebepker bolǵan. Sonyń saldarynan 31 adam kóz jumǵan.

Atyraý oblysy polıtsııa departamentiniń baspasóz qyzmetinen málim etkendeı, jol-kólik apatynan kóz jumǵandar sany azaımaı otyr. 

— Jol erejesin jıi buzatyndar qatarynda taksı júrgizýshileri de bar. Máselen, sońǵy 3 jylda olardyń kesirinen 112 jol-kólik oqıǵasy tirkeldi. Jol apatynyń saldarynan 31 adam qaza tapty. Al 208 adam túrli dene jaraqatyn aldy. Osyǵan baılanysty polıtsııa qyzmetkerleri taksı júrgizýshilerine jol erejesin saqtaýdyń qajettigin túsindirdi. Basty maqsat jol apatynyń aldyn alý, — dep habarlady departamenttiń baspasóz qyzmeti.

Polıtsııa qyzmetkerleriniń pikirinshe, jol-kólik oqıǵasyna ushyratatyn birneshe sebep bar. Birinshiden, jyldamdyqty asyrmaý qajet. Ekinshiden, alda ketip bara jatqan kólikti basyp ozý kezinde abaı bolǵan jón. Úshinshiden, jaıaý júrginshilerge jol berý kerek. Eń bastysy — jol erejesin qatań saqtaý.

— Taksı júrgizýshilerine jol erejelerin buzý, onyń saldary qaıǵyly oqıǵaǵa ulasýy múmkin ekeni eskertildi. Rýlge sharshaǵan kúıde otyrmaý, mobıldi telefon qoldanbaý, kólik quralynyń tehnıkalyq jaǵdaıyn turaqty tekserýden ótkizý qajettigine basa nazar aýdaryldy, — dep málim etti departamenttiń baspasóz qyzmetinen.

Eske sala ketelik, budan buryn Atyraý oblysynda jyl basynan bergi 1 aıda jol apatynan 7 adam mert bolǵanyn habarlaǵan edik.