Atyraýda taǵy bir kúdiktiden 200 doza sıntetıkalyq esirtki tárkilendi

ATYRAÝ. KAZINFORM – Atyraýda sıntetıkalyq esirtkini taratpaq bolǵan taǵy bir kúdikti ustaldy. Kúdiktiden 200 doza sıntetıkalyq esirtki tárkilendi.

Atyraý oblystyq polıtsııa departamentiniń baspasóz qyzmetinen málim etkendeı, kúdiktiniń jaldamaly páterde turǵany anyqtalǵan. 

«Esirtki qylmysyna qarsy is-qımyl basqarmasynyń qyzmetkerleri «Qarasora» jedel profılaktıkalyq is-sharasy kezinde Atyraý qalasynyń aýmaǵynda esirtki taratýmen aınalysqan kúdiktini qylmys ústinde ustady. Kúdiktiniń jasy – 24-te. Onyń jaldamaly páterin tekserý barysynda salmaǵy 100 grammdy quraıtyn mefedron esirtkisiniń 200 dozasyn tabylyp, tárkilendi», -dep habarlady departamenttiń baspasóz qyzmeti. 

Qazir esirtki taratýmen aınalysqan kúdikti qamaýǵa alyndy. Kúdiktige qatysty qylmystyq is qozǵaldy. Sotqa deıingi tergeý amaldary júrgizý bastaldy. Ózge aqparat tergeý múddesine sáıkes jarııalaýǵa jatpaıdy. 

Eske sala ketelik, budan buryn Atyraýda er adamnan marıhýananyń 60 dozasy tárkilengenin jazǵan bolatynbyz. 

Sondaı-aq, Atyraýda úıiniń aýlasyna 47 túp qarasora ekken zeınetker ustalǵanyn habarlaǵan edik.